މިދިޔަ މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މާލޭގައި ދިން ބޮމުގެ ހަމަލާގެ ތަހުގީގު ފުރިހަމަކުރަން ފުލުހުން މަސައްކަތް ނުކުރާކަމުގެ ތުހުމަތު އެމަނިކުފާނު ކުރައްވައިފި އެވެ.
ނަޝީދު ގެންގުޅުއްވާ "އަނެއް ދިވެހިރާއްޖެ" ޓުވިޓާ އެކައުންޓު މެދުވެރިކޮށް ނަޝީދު ވިދާޅުވީ ހަމަލާއާއި ގުޅުވައި އެކަށީގެންވާ ތަހުގީގެއް ފުލުހުން ކުރިއަށް ގެންގޮސްފައި ނުވާ ކަމަށެވެ. އެގޮތުން ހަމަލާގެ ތުހުމަތުގައި ހައްޔަރު ކުރި މީހުންގެ ހަރަކާތްތައް ހުރި ގޮތް ފުލުހުން ޓްރޭސްކޮށްފައި ނުވާކަމަށް ވިދާޅުވި އެވެ.
"ގޮއްވައިލި ބޮން ހަދަން ބޭނުންކުރި މެޓީރިއަލްގެ އަސްލު ފުލުހުންނަށް ހޯދިފައެއް ނުވޭ"
- ރައީސް މުހައްމަދު ނަޝީދު
ނަޝީދު ވިދާޅުވީ މުޅި ޓެރަރިސްޓު ހަމަލާއަށް ފަންޑު ކުރި މީހުންނާއި އޭގެ އަޑީގައި ތިބީ ކޮން ބައެއްކަންވެސް ފުލުހުންނަށް ހޯދިފައި ނުވާ ކަމަށެވެ. މީގެ އިތުރުން އައިއީޑީ ހަދަން ބޭނުންކުރި ޓެކްނޮލޮޖީއާއި އެ އުފެއްދި މީހުންނަށް އެމައުލޫމާތު ލިބުނީ ކިހިނެއްކަންވެސް ފުލުހުންނަށް ހޯދިފައި ނުވާކަމަށް ނަޝީދު ވިދާޅުވި އެވެ.
ނަޝީދު ވިދާޅުވީ ހަމަލާ ދިނުމުގެ ކުރިން އެކަމުގެ މައުލުމާތު އެނގުނު ފަރާތްތައްވެސް ފުލުހުންނަށް ހޯދިފައި ނުވާކަމަށެވެ.
ރައީސް ނަޝީދަށް ދިން ޓެރަރިސްޓު ހަމަލާއާއި ގުޅިގެން ރައްޔިތުންގެ މަޖިލީހުން ކުރިއަށް ގެންދިޔަ އިންކުއަރީގައި ބުނާ ގޮތުން އެ ހަމަލާގެ މައުލޫމާތު އެމްޑީޕީގެ މަޖިލިސް މެމްބަރަކަށް ލިބި އެކަން ޑިފެންސް މިނިސްޓަރާއި ހިއްސާ ކުރެއްވި އެވެ. އެމައްސަލަ ފުލުހުން ބަލަމުން ގެންދާކަމަށް މައުލޫމާތު ދިންނަމަވެސް އޭގެ ތަފްސީލެއް ފުލުހުން ހާމައެއް ނުކުރެ އެވެ.
މި ފަހަކަށް އައިސް ރައީސް ނަޝީދުގެ ފާޑުކިޔުންތަކެއް މި ސަރުކާރުގެ ބައެއް ކަންކަމަށް ވަނީ އަމާޒުވެފަ އެވެ. ހާއްސަކޮށް ފުލުހުންގެ މުއައްސަސާ ފާހަގަކޮށްލެވެ އެވެ.
