އަޟްހާ އީދު ދުވަހާއި ދިމާކޮށް މާދަމާ އީދު ނަމާދު ކުރާނީ މާލެ ސަރަހައްދުގެ 39 މިސްކިތެއްގައި ކަމަށް އިސްލާމިކް މިނިސްޓްރީން ބުނެފި އެވެ.
މިއަހަރު މާލޭގައި އީދު ނަމާދުގެ ބޮޑު ޖަމާއަތެއް ނޯންނާނެ އެވެ. އެހެންނަމަވެސް މިނިސްޓްރީން މިއަދު ވަނީ އީދު ނަމާދު ކުރާނެ މިސްކިތްތަކުގެ ލިސްޓެއް ނެރެފަ އެވެ.
މާލޭ ސިޓީގައި 1442 ވަނަ އަހަރު އަޟްޙާ ޢީދު ނަމާދު ކުރުމަށް ހަމަޖެހިފައިވާ މިސްކިތްތައް#EidAlAdha #MVIaffairs pic.twitter.com/i0udu2K5dS
— Ministry of Islamic Affairs (@MVIaffairs) July 18, 2021
ބޮޑު ޖަމާއަތް ނުބާއްވަން ނިންމީ ކޮވިޑް-19 ގެ ސަބަބުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަޅާފައިވާ ފިޔަވަޅުތަކާއި އެއްގޮތަށް ގިނަ ބަޔަކު އެއްތަނަކަށް އެއްނުކުރުމަށް ކަމަށް އިސްލާމިކް މިނިސްޓްރީން ބުންޏެވެ.
މިއީ އަޟްހާ އީދު ނަމާދު ބޮޑު ޖަމާއަތުގައި ނުކުރާތާ ޖެހިޖެހިގެން ދެވަނަ އަހަރެވެ. މިދިޔަ އަހަރުވެސް ބޮޑު ޖަމާއަތް ނުބޭއްވީ ކޮވިޑް-19 ގެ ސަބަބުންނެވެ.
މާދަމާ އޮންނަ އީދު ނަމާދުގައިވެސް އެހެން ނަމާދުތަކެކޭ އެއްގޮތަށް ގައިދުރުކަން ބަހައްޓާނެ އެވެ. އަދި ނަމާދަށް މިސްކިތަށް ދާ އެންމެންވެސް މާސްކު އެޅުމަށާއި މުސައްލަ ގެންދިއުމަށް އިސްލާމިކް މިނިސްޓްރީން ވަނީ އިލްތިމާސްކޮށްފަ އެވެ.
