ސިޔާސީގޮތުން އޮތް ތާއިދު ގެއްލެމުންދާތީ ސަމާލުކަން ހޯދުމުގެ ގޮތުން ހައްލުހޯދަދީފައިވާ މައްސަލައެއްގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ސްޓެލްކޯއަށް ފާޑު ކިޔައިފި އެވެ.
ނަޝީދު އިއްޔެ ކުރެއްވި ޓުވީޓެއްގައި ވަނީ މާލޭ އިންޖީނުގެ މިހާރުވަނީ މާލެގައި ދިރިއުޅޭ ފަރާތްތަކަށް މުސީބާތަކަށްވެފައި ކަމަށާއި، ސިއްހީ ގޮތުންނާއި އެހެން ހުރިހާގޮތަކުންވެސް މުސީބާތަކަށްވެފައިވާ ކަމަށް ވިދާޅުވެފަ އެވެ. އަދި އިންޖީނުގެ ބޮޑުކުރަމުންދަނީ ގާނޫނަކާއި، ގަވައިދާ ހިލާފަށް ކަމަށާއި، އެކަމަށް ހައްލު ނުގެނެސް ސްޓެލްކޯއިން އެއްވެސް ކަމެއް ކުރުމަކީ ކުށެއް ކަމަށްވެސް ވިދާޅުވި އެވެ.
ނަޝީދު މިފަދައިން ވިދާޅުވެފައިމިވަނީ ހުޅުމާލެއާއި، މާލެއާއި ދެމެދު އަޅާފައިވާ ގެރޭޓާމާލެ ގްރިޑް ޓެސްޓުކޮށް ކާމިޔާބުކަމާއެކު ހުޅުމާލެއިން މާލެއަށް އަދި މާލެއިން ހުޅުލެއަށް ކަރަންޓު ފޯރުކޮށްދެވޭނެކަން ސްޓެލްކޯއިން އިއުލާންކޮށްފައިވަނިކޮށެވެ. އަދި އެ ގްރިޑް ސްޓޭބަލްވުމާއެކު، އިންޖީނުގެއާ ހެދި އުނދަގޫވާ ސަރަހައްދުގައި އުޅޭ ފަރާތްތަކަށް އެ އުނދަގޫ ކުރިމަތިވާ ހުރިހާ އިންޖީނެއް ބޭނުންކުރުން ހުއްޓާލާނެކަންވެސް ސްޓެލްކޯއިން އަންގާފައި ވަނިކޮށެވެ.
ސަރުކާރާއި ސްޓެލްކޯގެވެސް މާލޭ އިންޖީނުގޭގެ އޮޕަރޭޝަން ހުއްޓާލުމަށް ދުރުރާސްތާ ޕްލޭނެއް އެބައޮތް ކަމަށާއި، އެގޮތުން ހުޅުމާލޭގައި އިތުރު 50 މެގަވޮޓްގެ އިންޖީނުގެއެއް އަޅާ، މާލެއަށް ބޭނުންވާ ހުރިހާ ކަރަންޓެއް ގްރޭޓާމާލެ ގްރިޑް މެދުވެރިކޮށް، އެ އިންޖީނުގެއިން ފޯރުކޮށްދިނުމާއި، ތިލަފުށީގައި އިތުރު 150 މެގަވޮޓްގެ އިންޖީނުގެއެއް އަޅައި، ތިލަމާލެ ބްރިޖާއެކު، އިންޓަރކަނެކްޝަން ފޭސް ދޭއް ކުރިޔަށްގެންގޮސް އެ އިންޖީނުގެއާއި، މާލޭ އިންޖީނުގެ ގުޅާލަން ސްޓެލްކޯއިން ވަނީ ރާވާފަ އެވެ.
އިޔާދަ ކުރަނިވި ހަކަތަ ބޭނުން ކުރާމިންވަރު އިތުރު ކުރުމަށްވެސް ގިނަ މަސައްކަތްތަކެއް މިހާރުވެސް ކުރެވެމުން ދާކަމަށް މީގެ ކުރިން ސްޓެލްކޯއިން ވަނީ ބުނެފަ އެވެ.
