ކޮވިޑް-19 ގެ ބަލިމަޑުކަން ތަހައްމަލް ކުރަމުންދާ މި އުނދަގޫ ދަނޑިވަޅުގައި ސިޔާސީ ގޮތުން ބައިބައިވުން އުފެއްދުން ރަނގަޅު ނޫންކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެ އެވެ.
ޝަރީފު ވިދާޅުވީ ކޮވިޑުގެ ބަލިމަޑުކަމުގެ ތެރޭގައި މުޅި ގައުމުގެ ހާލަތު ގޯސްވެފައިވާއިރު ބައެއް ރައްޔިތުންގެ މޭޒުމަތީގައި ބަހައްޓާނެ ކާއެއްޗެއް ހޯދުމަށްވެސް ދަތިވެފައިވާ ކަމަށެވެ. ސިއްހީ ކުއްލި ނުރައްކަލުގެ ތެރޭގައި ބާރު ހޯދުމަށް ސިޔާސީ ގޮތުން ގައުމު ބައިބައި ކޮށްލުމަކީ އެންމެ ރަނގަޅު ގޮތް ނޫންކަމަށްވެސް އޭނާ ވިދާޅުވި އެވެ.
ޝަރީފު މިފަދައިން ވާހަކަ ދައްކަވާފައި މިވަނީ ސަރުކާރު ހިންގާ މައިޕާޓީ، އެމްޑީޕީގެ ރައީސް މުހައްމަދު ނަޝީދާއި، ރައީސް އިބްރާހިމް މުހައްމަދު ސޯލިހާއި ދެމެދު ހިޔާލު ތަފާތުވުންތަކެއް އުފެދި އެމްޑީޕީ ވަރަށް ބޮޑަށް ބައިބައިވެފައި ވަނިކޮށެވެ. ނަޝީދު ވަނީ މި ސަރުކާރަށް ކުރާ ތާއީދު އަނބުރާ ގެންދެވުމާއި ގުޅޭގޮތުންވެސް ވާހަކަ ދައްކަވައިފަ އެވެ.
ޝަރީފު ވަނީ މިފަދަ ބައިބައިވުންތަކުގެ ސަބަބުން ހާލަތު އިތުރަށް ގޯސްވަމުން ދާކަން ފާހަގަކުރައްވައިފަ އެވެ.
ސަރުކާރުގެ ތެރޭގައި ހިޔާލު ތަފާތުވުންތަކެއް އުފެދިފައިވާއިރު ކޯލިޝަން ހަދާފައިވާ 4 ޕާޓީ ގެ ތެރެއިން އާދާލަތު ޕާޓީއާއި ދެކޮޅަށް ނަޝީދު ގެންދަވަނީ ފާޅުގައި ވާހަކަ ދައްކަވަމުންނެވެ. ނަޝީދު ވިދާޅުވާ ގޮތުގައި ސަރުކާރުން މިހާރު ނިންމާ ނިންމުންތަކަށް ނުފޫޒު ފޯރުވަނީ އަދާލަތު ޕާޓީންނެވެ.
ނަޝީދު މިފަދައިން ވިދާޅުވި ނަމަވެސް ސަރުކާރު ކޯލިޝަންގައި އޮތް އަދާލަތުގެ އިތުރުން ޖުމްހޫރީ ޕާޓީއާއި އެމްއާރުއެމްއިންވެސް ވަނީ ރައީސް ސޯލިހާއިއެކު ކުރިއަށް ވަޑައިގަންނަވާނެ ކަމަށެވެ.
