ފޮރިން މިނިސްޓަރު އަބްދުﷲ ޝާހިދު އިންޑިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި ރާއްޖެއާއި އިންޑިއާއާ ދެމެދު އިތުރު އެމްއޯޔޫތަކެއްގައި ސޮއިކުރައްވާނެ ކަމަށް އިންޑިއާގެ ފޮރިން މިނިސްޓްރީން ބުނެފި އެވެ.
އެ މިނިސްޓްރީން ނެރުނު ބަޔާނެއްގައި ބުނީ ޝާހިދުގެ ދަތުރުފުޅުގައި ދެ ގައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާ ކުރާނެ ކަމަށެވެ. އަދި އިންޑިއާގެ އެހީގައި ރާއްޖޭގައި ހިންގަން ނިންމާފައިވާ ކޮމިއުނިޓީ ޑިވޮލޮޕްމަންޓާ ގުޅޭ މަޝްރޫއުތަކުގެ އެއްބަސްވުމުގައި ސޮއި ކުރާނެ ކަމަށެވެ.
އެމްއޯޔޫތަކުގެ ތަފްސީލު ހާމައެއް ނުކުރެ އެވެ. އިންޑިއާގެ ފޮރިން މިނިސްޓްރީން ބުނީ ތަފްސީލު ހާމަކުރާނީ ސޮއިކޮށް ނިމުމުން ކަމަށެވެ.
ޝާހިދު މީގެ ކުރިން ވިދާޅުވެފައިވަނީ އިންޑިއާއަށް ވަޑައިގެންނެވީ އދ. ގެ އާންމު މަޖިލީހުގެ ރައީސްގެ ހައިސިއްޔަތުން އެގައުމުގެ ދައުވަތަކަށް ކަމަށެވެ. މިއީ އދ. ގެ ރައީސްގެ ހައިސިއްޔަތުން ޝާހިދު ކުރައްވާ ފުރަތަމަ ދަތުރުފުޅުވެސް މެއެވެ.
ޝާހިދުގެ މި ދަތުރުފުޅުގައި ބޮޑުވަޒީރު ނަރެންދުރަ މޯދީއާއި ސަރުކާރުގެ އިސް ވެރިންނާވެސް ބައްދަލު ކުރައްވާނެ އެވެ.
