ރައްޔިތުންގެ މަޖިލީހުގެ ހިތަދޫ ދާއިރާގެ މެމްބަރު މުހައްމަދު އަސްލަމް އެމްޑީޕީން ފެއިލްކޮށްލި ގޮތް ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު ކިޔައިދެއްވައިފި އެވެ.
އަސްލަމް އަކީ އެމްޑީޕީގައި އެންމެ އިސްކޮށް ހަރަކާތެރިވާ އެއް ބޭފުޅާ އެވެ. މޫސަ ވިދާޅުވީ މީހަކު ކެއްތެރިވެ ހުންނަވައި ގުރުބާން ވާނީ މިހާކަށްވަރަށް ކަމަށެވެ. އެގޮތުން ގައުމު ނައިބު ރައީސްކަން، ޕާޓީގެ ނައިބު ރައީސްކަން، މަޖިލީހުގެ ރައީސްކަން އަދި ޕީޖީ ލީޑަރުކަން ދޭނަމޭ ބުނެ އެކަމަށް ކުރިމަތިއްލައްވާފައި ހުއްޓައި އެމްޑީގެ ވިރާސީ ވިންގުން އަސްލަމް ފެއިލްކޮށްލާފައިވާ ކަމަށް މޫސަ ވިދާޅުވި އެވެ.
މޫސަ ވަނީ އަސްލަމް ފެއިލްކޮށްލި މީހުން މިއަދު އުޅެނީ ކީއްކުރަންތޯވެސް ސުވާލު އުފައްދައިފަ އެވެ.
ރައީސް އިބްރާހިމް މުހައްމަދު ސޯލިހު އެމްޑީޕީގެ ރިޔާސީ ކެނޑިޑޭޓެއްގެ ގޮތުގައި ނިކުންނަވަން ނިންމެވި ހިސާބުން އެމަނިކުފާނުގެ ރަނިންމޭޓެއްގެ ގޮތުގައި އަސްލަމް ވާދަކުރެއްވި އެވެ. އެހެންނަމަވެސް ކޯލިޝަންގެ ތެރެއިން ވެރިކަމަށް ކުރިމަތިލާތީ އެ މަގާމު ފަހުން ދިނީ ޖޭޕީގެ މެމްބަރަކަށެވެ.
އޭގެ ފަހުން އެމްޑީޕީގެ ނައިބުރައީސްކަމަށްވެސް އަސްލަމް ކުރިމަތިލެއްވި އެވެ. އެ މަގާމަށް އޭނާ ނުހޮވުމުން 2019 ވަނަ އަހަރުގެ މަޖިލީހުގެ ރައީސްކަމަށް އަސްލަމް ކުރިމަތިލެއްވީ ރައީސް ސޯލިހުގެ ތާއީދާއިއެކުވެސް މެއެވެ. އެހެންނަމަވެސް ރައީސް ނަޝީދު އެކަމާއި ދެކޮޅު ހައްދަވައި މައްސަލަ ހޫނުވުމުން މަޖިލިސް ރައީސް ކަމަށް އެންމެ ފަހުން އިންތިހާބުވީ ހުދު ނަޝީދެވެ.
މަޖިލީހުގައި އެމްޑީޕީގެ ޕާލަމެންޓަރީ ލީޑަރު ކަމަށްވެސް އަސްލަމް ގެންނަން މަސައްކަތް ކުރި އެވެ. އެހެންނަމަވެސް އެމަގާމަށްވެސް އިންތިހާބު ކުރީ ނަޝީދަށް ތާއީދު ކުރައްވާ އަލީ އާޒިމް އެވެ.
އަސްލަމް މިހާރު ގެންދަވަނީ ރައީސް ނަޝީދު ސަރުކާރާއި ދެކޮޅަށް ދައްކަވާ ވާހަކަފުޅުތަކާއި ގުޅިގެން ނަޝީދަށް ރައްދު ދެއްވަމުންނެވެ. އެގޮތުން ރައީސް ސޯލިހުގެ ސަރުކާރު ބަލިކަށިކޮށްލަން ނަޝީދު ކުރައްވާ މަސައްކަތް ބަލައި ނުގަނެވޭކަމަށް އަސްލަމް ވިދާޅުވި އެވެ.
