މާލެއާއި ހުޅުމާލެ އެއް ވިއުގާއަކުން ގުޅައިލުމަށް މިހާރު ކުރިއަށް ގެންދާ ގްރިޑް ޕްރޮޖެކްޓުގެ މަސައްކަތް ކުރިއަށް ދާތީ މިއަދު މެންދުރުފަހު 3:00 އާއި އިރުއޮއްސި 6:00 އާއި ދެމެދު ހުޅުމާލެއިން ކަރަންޓު ކެނޑިދާނެ ކަމަށް ސްޓެލްކޯއިން ބުނެފި އެވެ.
ރާއްޖޭގައި އެންމެ ބޮޑު ހަކަތައިގެ ސިނާއަތުގެ މަސައްކަތް ކުރިއަށް ދާތީ މީގެ ކުރިން މާލެއިންވެސް ވަނީ ބައެއް ވަގުތުތަކުގައި ކަރަންޓު ކަނޑާލައިފަ އެވެ. އެގޮތުން މިދިޔަ ބުދަ ދުވަހު މުޅި މާލެއިން ކަރަންޓު ކެނޑުމަށްފަހު ގާތްގަނޑަކަށް ގަޑިއިރެއްހާއިރު ތެރޭގައި އަލުން ވަނީ ކަރަންޓު ދީފަ އވެެ.
މާލެއާއި ހުޅުމާލެ ކަރަންޓުގެ ހިދުމަތް އެއް ވިއުގާއަކުން ގުޅާލުމާއިއެކު ކުރިއަށް އޮތް ތަނުގައި ކަރަންޓު ކެނޑުމުގެ މައްސަލައަށް ހައްލުތަކެއް ލިބިގެންދާނެކަމަށް ސްޓެލްކޯއިން މީގެ ކުރިން ވަނީ ބުނެފަ އެވެ. މިހާރު ކަރަންޓު ކެނޑެނީ ޓެސްޓިން މަރުހަލާގަ އެވެ.
ގްރިޑު ގާއިމް ކުރުމަށްފަހު ހުޅުމާލޭގައި 50 މެގަވޮޓްގެ އިންޖީނުގެއެއް އަޅައި މާލެއަށް ބޭނުންވާ ކަރަންޓު އެ އިންޖީނުގެއިން ފޯރުކޮށްދޭން ސްޓެލްކޯއިން ވަނީ އަމާޒު ހިފައިފަ އެވެ. އަދި މާލެއާއި، ވިލިމާލެ، ގުޅިފަޅުގެ އިތުރު ތިލަފުށި ގުޅައިލަން އަޅާ ތިލަމާލެ ބްރިޖުގެ މަޝްރޫއު ނިމުމުން މި ސަރަހައްދު އެއްކޮށް ކަރަންޓު އެއް ވިއުގާއަކުން ގުޅާލައި ތިލަފުށީގައި އިންޖީނުގެއެއް އަޅަންވެސް ސްޓްލެކޯއިން ވަނީ ރާވައިފަ އެވެ.
މިހާރު މާލޭގައި ސްޓެލްކޯގެ އިންޖީނުގެ ހުންނަ ހިސާބުގައި ގިނަ ބަޔަކު ދިރިއުޅެމުން ދާއިރު އިންޖީނުގެއިން އަރާ ކަޅު ދުމުގެ ސަބަބުން އެސަރަހައްދުގައި ދިރިއުޅޭ މީހުންގެ ޝަކުވާ ވަނީ އިތުރުވެފަ އެވެ. މި މަޝްރޫއުތައް ނިމުމުން އެކަމަށް ހައްލެއް ލިބިގެންދާނެ ކަމަށް ސްޓެލްކޯއިން ބުނެ އެވެ.
