ޔޫތު މިނިސްޓަރު އަހުމަދު މަހުލޫފުގެ މައްޗަށް ހިޔާނާތުގެ ތުހުމަތު ކުރެވޭ މައްސަލައިގައި ދައުވާކުރުމާ މެދު ގޮތް ނިންމަން ވަކި ތާރީޚެއް ނެތް ކަމަށް [ޕްރޮސެކިއުޓަރ ޖެނެރަލްގެ އޮފީސް] ޕީޖީ އޮފީހުން ބުނެފި އެވެ.
ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު ހަމައެމްވީއަށް ވިދާޅުވީ ކުރިން އެމައްސަލައިގައި ގޮތް ނިންމަން ނިންމީ އީދުގެ ކުރިން ކަމަށާއި ނަމަވެސް އެމައްސަލައަކީ ޖޮއިންޓް އިންވެސްޓިގޭޝަންއެއް ކަމުން މައްސަލައިގައި ދިރާސާ ކުރަންޖެހޭ ކަންތައްތަކެއް އެބަހުރި ކަމަށެވެ. އެހެންކަމުން މައްސަލައިގައި ގޮތްނިންމާނެ ވަކި ތާރީޚެއް ނެތް ކަމަށް އޭނާ ވިދާިޅުވި އެވެ.
ކުށްކޮށްގެން ހޯދާފައިވާ 33،000 ޑޮލަރު މަހުލޫފަށް ލިބުނުކަމުގެ ތުހުމަތު ކުރެވޭތީ ފުލުހުންނާއި އެސެޓް ރިކަވަރީ ކޮމިޝަންގެ ޖޮއިންޓް އިންވެސްޓިގޭޝަނަށް ފަހު އެ މައްސަލައިގައި މަހުލޫފުގެ މައްޗަށް ދައުވާ ކޮށްދިނުމަށް އެދި އޭސީސީން ޕީޖީ އޮފީހަށް ފޮނުވީ މިދިޔަ މަހުގެ 9 ވަނަ ދުވަހު އެވެ. އޭރު ޕީޖީއިން ބުނެފައިވަނީ އެމައްސަލައިގައި ދެ ހަފްތާ ތެރޭގައި ގޮތް ނިންމާނެ ކަމަށެވެ.
މަހުލޫފުގެ މައްޗަށް ދައުވާ ކޮށްދިނުމަށް އެދި އޭސީސީ އިން ޕީޖީގެ އޮފީހަށް ފޮނުވުމާ ގުޅިގެން މިނިސްޓަރުކަމުން ސަސްޕެންޑް ކޮށްފައިވާ މަހުލޫފު ވިދާޅުވެފައިވަނީ އެމްއެމްޕީއާރުސީގެ ބޮޑު ހިޔާނާތުގެ ފައިސާ ލިބުނު ފަރާތްތަކުގެ ތެރެއިން ދައުލަތުގެ މަގާމުތަކުގައި ތިއްބެވި ބޭފުޅުންނާއި ކުރިން ތިއްބެވި ބޭފުޅުންގެ ނަން ހިމެނޭ ގޮތަށް އާންމުކުރީ "ސިޔާސީ" ލިސްޓެއް ކަމަށެވެ.
އޭސީސީން ބުނީ ގަލޮޅު ދެކުނު ދާއިރާގެ މެމްބަރުގެ ގޮތުގައި މަހުލޫފު ހުންނެވިއިރު، ރައްޔިތުންގެ މަޖިލީހުގެ ތަޅުމުގައި ބަހުސްކޮށް ވޯޓަށް އެހި ސްޕެޝަލް އިކޮނޮމިކް ޒޯން (އެސްއީޒެޑް) ބިލަށް ވޯޓުދިނުމާއި ޕީޕީއެމްގައި ދެމިހުރުމުގެ ބަދަލެއްގެ ގޮތުގައި 33,000 ޑޮލަރު އޭނާ އަށް ލިބިވަޑައިގެންފައިވާ ކަމަށެވެ.
އޭގެ އިތުރުން، އެސްއީޒެޑް ބިލް ފާސްކުރަން ވޯޓު ދެއްވުމަށް އޮގަސްޓް 27، 2014 މަޖިލީހުގެ ޖަލްސާ އަށް މަހުލޫފު ވަޑައިގެންފައި ވަނީ ސީދާ މަޖިލީހުގެ ވޯޓަށް ކަމަށް ވެސް އެ ކޮމިޝަނުން ބުންޏެވެ.
މިއީ މި މައްސަލާގައި މަހުލޫފު ސަސްޕެންޑް ކުރި ދެވަނަ ފަހަރެވެ. 2019 ވަނަ އަހަރު އެމްއެމްޕީއާރުސީގެ ޚިޔާނާތުގެ ފައިސާ ލިބުނު
އެސްއޯއެފުން ޑޮލަރު ޖަމާކުރި ފަރާތްތަކުގެ ތަފްސީލު ހިމެނޭ ރިޕޯޓު އާންމު ކުރުމާއެކު އެއަހަރުގެ ފެބްރުއަރީ 14 ވަނަ ދުވަހު ވެސް އޭނާ ސަސްޕެންޑު ކުރި އެވެ. މަހުލޫފުގެ ސަސްޕެންޝަން އުވާލީ އޭގެ ދެ މަސް ފަހުން އޭޕްރީލް 16 ގަ އެވެ.
އެ މައްސަލާގައި ދެވަނަ ފަހަރަށް މަހުލޫފު ސަސްޕެންޑް ކޮށްފައިވަނީ ޖޫން މަހުގެ 19 ވަނަ ދުވަހު އެވެ.
