ކުއްލި ނުރައްކާ އިއުލާން ކުރަން އެމްޑީޕީގެ ގައުމީ މަޖިލީހުގެ ޖަލްސާއަށް ހުށައަޅަން ނުފެންނަ ކަމަށް މަޖިލީހުގެ ސަލާމަތީ ޚިދުމަތްތަކުގެ ކޮމިޓީ (241 ކޮމިޓީ) ގެ މުގައްރިރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.
މިރޭ އޮންނަ އެމްޑީޕީ ގައުމީ މަޖިލީހަށް ހުށައެޅުމަށް މަޖިލީހުގެ ރައީސް މުހައްމަދު ނަޝީދު ވަނީ ގަރާރެއް ހުށައަޅުއްވާފަ އެވެ. އެއަށް އަސްލަމް ވިދާޅުވީ ކުއްލި ނުރައްކަލުގެ ހާލަތު އިއުލާން ކުރުމަށް ފެނި ނުލައްވާކަމަށާއި ޓެރަރިސްޓުން ހައްޔަރު ކުރުމަށް ކުރެވެން ހުރި ކަންތައްތައް ބަލައި އަވަހަށް ހައްޔަރު ކުރުމަށް ފުރިހަމައަށް ތާއީދު ކުރައްވާ ކަމަށެވެ.
މިދިޔަ މެއި މަހުގެ ހަވަނަ ދުވަހުގެ ރޭ ނަޝީދު އަވަހާރަކޮށްލަން ދިން ބޮމުގެ ހަމަލާއިން އެމަނިކުފާނުގެ ހަށިކޮޅަށް ލިބިވަޑައިގެންނެވި ޒަޚަމްތަކުގެ ފަރުވާ ހޯއްދެވުމަށް މިވަގުތު ހުންނެވީ އިނގިރޭސި ވިލާތުގަ އެވެ.
ނަޝީދަށް ދިން ހަމަލާގެ ތަފްސީލު ރޭ ފުލުހުންނާއި ޕްރޮސެކިއުޓަރ ޖެނެރަލް ބޭއްވި ނޫސްވެރިންގެ ބައްދަލުވުމުގައި އާންމު ކޮށްފައިވާ އިރު، އެކަމާއި ގުޅިގެން މަޖިލީހުގެ ދައުރުން ބޭރުން ޖަލްސާއެއް ބޭއްވުމަށް ވެސް އެމަނިކުފާނު ވަނީ ހުށައަޅުއްވާފަ އެވެ.
ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން 10 މީހަކު ހައްޔަރުކޮށް، އެ މީހުންނަށް ދައުވާ ކުރަން ފުލުހުން ވަނީ ޕްރޮސެކިއުޓާ ޖެނެރަލްގެ އޮފީހަށް ފޮނުވައިފަ އެވެ.
އެމްޑީޕީގެ ގައުމީ މަޖިލީހުގެ ވަޓްސްއެޕް ގުރޫޕަށް ނަޝީދު ފޮނުއްވި މެސެޖެއްގައި ވިދާޅުވީ ހޯމް މިނިސްޓްރީ ވެސް ރައީސް އިބްރާހިމް މުހައްމަދު ސޯލިހުގެ ބެއްލެވުމުގެ ދަށަށް ގެންނަވަން ޖެހޭ ކަމަށެވެ. އަދި ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރަން ވެސް ޖެހޭ ކަމަށް ނަޝީދު ވިދާޅުވިއެވެ.
ހަރުކަށި ފިކުރުގެ މީހުން ވަރަށް ގިނަ ވެއްޖެ ކަމަށާއި އެފަދަ މީހުންނަށް ބާރު ލިބޭ ގޮތަށް ވާހަކަ ދައްކާ މީހުން ގިނަވުމާއި ގުޅިގެން މިފަދަ ގިނަ މީހުން ހައްޔަރު ކުރަން ބޭނުންތެރި ކަމަށް އެ ގުރޫޕުގައި ނަޝީދު ވިދާޅުވި އެވެ.
