މޯލްޑިވިއަން ޑިމޮކްރަޓިކް ޕާޓީ [އެމްޑީޕީ]ގެ ގައުމީ މަޖިލީހުގެ ޖަލްސާގައި އެޕާޓީގެ ރައީސް، ރައީސް މުހައްމަދު ނަޝީދު ބައިވެރިވެވަޑައިގެންފި އެވެ.
މިއީ މެއި މަހުގެ 6 ވަނަ ދުވަހު އެމަނިކުފާނަށް އަމާޒުވި ޓެރަރިޒަމްގެ ހަމަލާއަށްފަހު ޖަލްސާއެއްގައި ބައިވެރިވެވަޑައިގެންނެވި ފުރަތަމަ ފަހަރެވެ.
ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން 10 މީހަކު ހައްޔަރުކޮށްފައިވާއިރު އެމަނިކުފާނަށް ހަމަލާ ދީފައިވަނީ ފުލުހުން ބުނެފައިވާ ގޮތުން އެމަނިކުފާނަކީ ކާފަރެއް ކަމަށް އެ މީހުން ގަބޫލު ކުރާތީ ކަމަށެވެ.
މިރޭ 9 ޖެހިއިރު ފެށި ޖަލްސާ ފައްޓަވައިދެއްވަމުން ޓެރަރިޒަމާ ދެކޮޅަށް ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރަން ގޮވާލާ ގަރާރެއް އެމަނިކުފާނު ވަނީ ހުށައަޅުއްވާފަ އެވެ.
ނަޝީދު ހުށައެޅުއްވި ގަރާރުގައިވަނީ ފުލުހުން ރޭ އާންމުކުރި މައުލޫމާތުތަކާ ގުޅިގެން ސަރުކާރުން އަމަލު ކުރަންޖެހޭ ގޮތް އެމްޑީޕީން ހާމަކުރަން ޖެހޭ ކަމަށެވެ.
އަދި އެކަމާ ގުޅިގެން ކުއްލި ނުރައްކަލުގެ ހާލަތު އިއުލާންކޮށް އަދި ޓެރަރިސްޓުން ހައްޔަރު ކުރަން ފުލުހުންނަށް ފުރުސަތު ދޭން ސަރުކާރަށް ގޮވާލުމަށް އެ ގަރާރުގައި އެމަނިކުފާނު ހުށަހަޅުއްވާފައިވެ އެވެ.
މިރޭގެ ޖަލްސާގައި ކުއްލި ނުރައްކާ އިއުލާން ކުރުމަށް ގައުމީ މަޖިލީހަށް ނަޝީދު ހުށައެޅުއްވި ކަމުގައި ވިއަސް ގާނޫނު އަސާސީ ބުނާގޮތުން ކުއްލި ނުރައްކަލުގެ ހާލަތު އިއުލާން ކުރެވޭނީ ރައީސަށް އެކަންޏެވެ.
