މި ސަރުކާރުން ވަނީ ރާއްޖޭގެ މިނިވަންކަން ނީލަމުގައި ވިއްކާލާފައި ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
މިނިވަން ދުވަހާއި ގުޅިގެން ޖަމީލު މިއަދު ކުރެއްވި ޓުވީޓެއްގައި ވިދާޅުވީ ރާއްޖޭގެ ހުރިހާ ކަމަކަށް ބޭރުގެ ނުފޫޒު ވަދެ ނިމިއްޖެ ކަމަށެވެ. އެގޮތުން އަމިއްލަ ބާރު ނުފޯރާ ގޮތަށް ބަނދަރުތަކާއި ބިންފަދަ ހަރު މުދާ ދޫކުރުމަކީ އަޅުވެތިކަމުގެ ބިންގާ ކަމަށްވެސް ޖަމީލު ވިދާލުވި އެވެ.
ޖަމީލު ވިދާޅުވީ މި ސަރުކާރުން ވަނީ ގައުމުގެ މިނިވަންކަން ނީލަމުގައި ވިއްކާލާފައި ކަމަށެވެ. އެހެންކަމުން މި ވަގުތަކީ އަޅުވެތި ނުވެ، މިނިވަންކަން ދިފާއު ކުރަން ހިތްވަރު ކުރަންވީ ވަގުތު ކަމަށްވެސް އޭނާ ވިދާޅުވި އެވެ.
ދިވެހި ސަރުކާރުން އިންޑިއާއާއެކު ގޮތް ނޭނގޭ އެއްބަސްވުންތަކެއް ހަދާފައިވާކަމުގެ ވާހަކަ އިދިކޮޅުން ދައްކަމުން އަންނަތާ ދުވަސްތަކެއް ވެއްޖެ އެވެ. އެކި ފަހަރު މަތިން އެ އެއްބަސްވުންތަކުގެ ތަފްސީލު ހާމަ ކުރަން އެދުނު ނަަމަވެސް ސަރުކާރުން ވަނީ އެކަމާއި ދެކޮޅު ހަދައިފަ އެވެ. ބުނަނީ ރާއްޖެއާ އިންޑިއާގެ ގުޅުމަށް ބުރޫ އަރައިފާނެތީ ތަފްސީލު ހާމަކުރެވެން ނެތް ކަމަށެވެ.
ރާއްޖޭގައި އިންޑިއާ ސިފައިން ތިބޭތީ އެކަމާވެސް އެކި ފަރާތްތަކުން ކަންބޮޑުވުން ފާޅު ކުރަމުން ދާއިރު، އައްޑޫ ސިޓީގައި އިންޑިއާގެ ކޮންސިއުލޭޓެއް އެޅުމަށް އިންޑިއާ ސަރުކާރުން ނިންމުމުން އެކަމާއި ދެކޮޅަށް ބޮޑު ކެމްޕެއިނެއްވެސް ފެށި އެވެ. މިހާރުވެސް ކުރިއަށްދާ މި ކެމްޕެއިން އިންޑިއާގެ ނޫސްތަކުގެ ސަމާލުކަމަށްވެސް ވަނީ އައިސްފަ އެވެ.
މިކަމާއި ގުޅިގެން ބައެއް މީޑިއާތަކާއި ވަކިވަކި ނޫސްވެރިންނަށް ފިޔަވަޅު އެޅުމަށް އިންޑިއާ ހައި ކޮމިޝަނުން ފޮރިން މިނިސްޓްރީގައިވެސް އެދުނެވެ. އިންޑިއާއިން ރާއްޖޭގެ ދާހިލީ ކަންކަމުގެ ތެރެއަށް ވަންނާތީ އިދިކޮޅުން ބުނަމުން ދަނީ އެއީ އަޅުވެތިކަމުގެ ފެށުން ކަމަށެވެ. އަދި ބޭރުގެ އެއްވެސް ގައުމަކުން ވަކި ހައްދެއްނެތި ރާއްޖޭގެ ކަންކަމުގެ ތެރެއަށް ވަންނަނަމަ އެއީ ނުރައްކާތެރި ކަމެއްކަމަށް ބުނެ އެވެ.
