ރާއްޖެއިން އޯޑަރުކުރި އެސްޓްރަޒެނިކާ ވެކްސިން ލިބުމާއިއެކު، އެވެކްސިން ޖެހުމުގެ ހާއްސަ ޕްރޮގުރާމެއް މިމަހު 31 ގައި މާލެ ސަރަހައްދުގައި ފަށަން ހަމަޖެހިއްޖެ އެވެ.
ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ) އިން މިއަދު ބޭއްވި ނޫސްވެރިންގެ ބައްދަލުވުމުގައި އިމިއުނިޒޭޝަން ޕްރޮގުރާމުގެ ފަރާތުން ވާހަކަ ދައްކަވަމުން ނާޝިޔާ އަބްދުލް ގަފޫރު ވިދާޅުވީ އަތޮޅު ތެރޭގެ ރަށްތަކުގައި އެސްޓްރަޒެނިކާ ވެކްސިން ޖެހުމުގެ ޕްރޮގުރާމު މިއަދުން ފެށިގެން ކުރިއަށް ގެންދާ ކަަމަށެވެ.
މިމަހު 31 ގައި މާލެ ސަރަހައްދުގައި ފަށާ ވެކްސިން ޕްރޮގުރާމުގައި 6 ސެންޓަރެއްގައި ވެކްސިން ޖަހާނެ ކަމަށް ނާޝިޔާ ވިދާޅުވި އެވެ. އެއީ ސޯޝަލް ސެންޓަރު، އިސްލާމީ މަރުކަޒު، އާޓް ގެލެރީ، ދަމަނަވެށި، ވިލިމާލެ ޔޫތު ސެންޓަރުގެ އިތުރު ހުޅުމާލެ ހޮސްޕިޓަލުގަ އެވެ.
"ދެން ވެކްސިން ޖެހުމުގެ ކަންކަން ކުރިއަށް މިދަނީ ހުޅުމާލެ ހޮސްޕިޓަލުގަ ހެނދުނު 9 އިން ހަވީރު 5 ޖަހަންދެން. ދެން ހުރި ފަސް ސެންޓަރުގަވެސް ހެނދުނު 9 އިން ހަވީރު 4 ޖަހަންދެން ވެކްސިންގެ މަސައްކަތް ކުރިއަށް ދާނީ"
- ނާޝިޔާ އަބްދުލް ގަފޫރު
ރާއްޖޭގައި އެންމެ ފުރަތަމަ ޖަހަން ފެށި ކޮވިޝީލްޑް ވެކްސިންގެ ފުރަތަމަ ޑޯޒް ޖެހުމަށްފަހު ދެވަނަ ޑޯޒް ނުޖެހި ތިބި ފަރާތްތަކަށް ދެވަނަ ޑޯޒް އެސްޓްރަޒެނިކާ ވެކްސިނުން ފުރިހަމަކުރެވޭނެ ކަަމަށާއި އެ އިންތިޒާމުވެސް ހަމަޖެހިފައިވާކަމަށް ނާޝީޔާ ވިދާޅުވި އެވެ.
ނާޝިޔާ ވަނީ އެސްޓްރަޒެނިކާ ވެކްސިންގެ އިތުރު ސިނޮފާމް ވެކްސިން ޖެހުމުގެ ކަންކަންވެސް މާލެ ސަރަަހައްދުގައި ކުރިއަށް ދާކަމަށާއި މިއަދުން ފެށިގެން ސެނެހިޔާގެ އިތުރުން ޓްރީޓޮޕް ހޮސްޕިޓަލުގައި އެކަން ކުރިއަށް ގެންދެވޭނެކަމަށް ވިދާޅުވެފަ އެވެ. ސިނޯފާމް ވެކްސިން ޖަހައިދެނީ ހެނދުނު 9 އިން 11 އަށެވެ.
އެސްޓްރަޒެނިކާ ވެކްސިން ޖެހުމުގެ ކަންކަން މާލެ ސަރަހައްދުގައި ކުރިއަށް ގެންދާނީ ކުރީބައިގައި އެޗްޕީއޭގެ ޕޯޓަލްގައި އެޕޮއިންޓްމެންޓު ހައްދައިގެންނެވެ. އެގޮތުން ބޭނުން ވަގުތަކަށް އެޕޮއިންޓްމެންޓު ހެއްދޭނެ ކަމަށާއި ހަމަޖެހޭ ގަޑީގެ 10 ނުވަތަ 15 މިނެޓު ކުރިން ވެކްސިން ސެންޓަރުތަކަށް ދިޔުމަށްވެސް ނާޝިޔާ ވަނީ އެދިލައްވައިފަ އެވެ. އެޕޮއިންޓްމެންޓު ހައްދަންޖެހޭނީ book.hpa.gov.mv އިންނެވެ.
އަތޮޅު ތެރެއިން ވެކްސިން ޖަހާ ފަރާތްތަކަށް އެޕޮއިންޓްމެންޓު ހައްދާކަށް ނުޖެހޭނެ އެވެ.
