މާލެ ސިޓީގެ މިމަހުގެ ކަރަންޓު ބިލުތައް ބޮޑުވުމުގެ ޝަކުވާ އިތުރުވެ މޭޔަރު ޑރ. މުހައްމަދު މުއިއްޒު ކަންބޮޑުވުން ފާޅު ކުރައްވައިފި އެވެ.
މާލޭގެ ގޭބީސީތަކުގެ ކަރަންޓު ބިލު ބޮޑުވުމާއި ގުޅިގެން ގިނަ ބަޔަކު އަންނަނީ އެކަމުގެ ޝަކުވާ ސޯޝަލް މީޑިއާގައި ކުރަމުންނެވެ. ކޮވިޑް-19 އާއި ގުޅިގެން މިދިޔަ މަހު ކަރަންޓާއި ފެނުގެ ބިލުތަކުން ވަނީ ލުއިތަކެއް ދީފަ އެވެ. އެހެންނަމަވެސް މިމަހު ބިލުތައް ވަނީ އާދަޔާ ހިލާފަށް މައްޗަށް ގޮސްފައިކަމަށް މާލޭގައި ދިރިއުޅޭ ރައްޔިތުން ދަނީ ބުނަމުންނެވެ.
މިކަމަށް އެޑްރެސް ކުރައްވައި މޭޔަރު މުއިއްޒު ވިދާޅުވީ މިމަހުގެ ކަރަންޓު ބިލަކީ މާލޭގެ ގިނަ ރައްޔިތުންނަށް ދެއްކޭވަރަށްވުރެއް ބޮޑު ބިލެއް ކަމަށެވެ. ހާލުގައި އުޅެމުންދާ ރައްޔިތުން އިތުރަށް ހާލުގައި ޖެހޭގޮތް މެދުވެރިވެފައިވާކަމަށް މުއިއްޒު ވިދާޅުވި އެވެ.
"ރައްޔިތުންގެ އަތުގައި ނެތް ފައިސާއަކުން ބިލު ދައްކަން މިވަނީ ޖެހިފައި"
- މޭޔަރު ޑރ. މުހައްމަދު މުއިއްޒު
މުއިއްޒު މިފަދައިން ވިދާޅުވިއިރު ކޮވިޑް-19 ގެ ސަބަބުން މީގެ ދެ އަހަރު ކުރިން އަސަރު ކުރި ގިނަ މީހުންގެ އާމްދަނީއަށް އަދިވެސް އެދެވޭ ބަދަލެއް ނާދެ އެވެ. އިގްތިސޯދަށް ނޭދެވޭ އަސަރުތަކެއް ކުރުމުގެ ސަބަބުން ގިނަ ކުންފުނިތަކުގެ މުސާރައާއި އިނާޔަތްތައް ކުރިން ހުރި ވަރަށް އަދިވެސް އިއާދަ ނުވެ އެވެ.
ހާއްސަކޮށް މާލެ ސަރަހައްދުގެ ކުދި އަދި މެދު ފަންތީގެ ވިޔަފާރިތަކަށް މިދިޔަ ދެ އަހަރު ދުވަހު ވަނީ ބޮޑެތި ގެއްލުންތަކަކާއި ކުރިމަތިލާން ޖެހިފަ އެވެ. މާލެ ސަރަހައްދުގައި ގިނަ ދުވަސްތަކެއް ވަންދެން ލޮކްޑައުންގެ ހާލަތު އިއުލާންކޮށްފައި އޮތުމުން ވިޔަފާރިތަކުން ހިދުމަތް އެންމެ އެދެވޭ ގޮތުގައި ދެވިފައެއް ނުވެ އެވެ.
