ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފުރާނަފުޅު ދުއްވައިލަން މިދިޔަ މާޗު މަހުގެ 6 ވަނަ ދުވަހު ދިން ބޮމުގެ ހަމަލާ އިސްކޮށް ރޭވި އަލީ ހައިޝަމްގެ މައްޗަށް ދައުވާކުރަން ޕްރޮސެކިއުޓާ ޖެނެރަލް އޮފީހަށް ފޮނުވައިފި އެވެ.
ޕީޖީ ހުސައިން ޝަމީމު މިއަދު ވިދާޅުވީ ރައީސް ނަޝީދަށް ދިން ބޮމުގެ ހަަމލާއާއި ގުޅިގެން ހައްޔަރުކުރި އިތުރު މީހެއްގެ މައްޗަށް ދައުވާކޮށްދިނުމަށް އެދި މިއަދު ޕީޖީއަށް ފުލުހުން ފޮނުވާފައިވާ ކަމަށެވެ. އަދި ވިދާޅުވީ ހައިޝަމްއަށް ދައުވާ ކުރުމާއިމެދު ގޮތެއް ނިންމަން ޕީޖީއަށް 15 ދުވަހުގެ މުއްދަތެއް ލިބޭނެ ކަމަށެވެ.
ޝަމީމް ވިދާޅުވީ އަންނަ ހަފްތާ ނިމުމުގެ ކުރިން ދައުވާ ކުރުމާއިމެދު ގޮތެއް ނިންމާނެ ކަމަށެވެ.
ބޮމުގެ ހަމަލާ އާއި ގުޅިގެން ފުލުހުން 10 މީހަކު ވަނީ ހައްޔަރު ކޮށްފަ އެވެ. ފުރަތަމަ ހައްޔަރުކުރި ހަތަރު މީހުންނަކީ ވ. ތިނަދޫ ލަކީ އަދުހަމް އަހްމަދު (25 އ)އާއި، މއ. ފޭރުގެ މުޖާޒް އަހުމަދު (21 އ) އާއި، ގއ. ކޮނޑޭ ފޮޅޭމާ ތަހުމީން އަހްމަދު (32 އ)ގެ އިތުރުން ލ. ގަން ދުންފިނިއުފާ އަހްމަދު ފާތިހް (23 އ) އެވެ. މި ހަތަރު މީހުންގެ މައްޗަށް ދައުވާ ކުރުމަށް ޕީޖީ އޮފީހަށް ވަނީ ފޮނުވައިފަ އެވެ. މި މީހުންނަށް ދައުވާ ކުރުމާއިމެދުވެސް އަންނަ ހަފްތާގައި ގޮތެއް ނިންމާނެ އެވެ.
ދެން މި މައްސަލައިގައި ހައްޔަރު ކުރީ ކ. މާލެ މާފަންނު ކުދެހިގެ އިސްހާގު އާއި ގއ. ވިލިގިލި ހުދުރުވާގެ ފަހުމީ އަލީ އާއި އއ. މާޅޮސް އަސަރީގެ މުހައްމަދު ނާޒިމް އާއި ހއ. މޮޅަދޫ ބަހާރުގޭ އަބްދުﷲ އަލިމަނިކު އަދި ހއ. ހޯރަފުށީ އަލަނާސިގޭ މުހައްމަދު ތަސްމީން އެވެ.
ފުލުހުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ މި ހަމަލާއަށް ބަޔަކު ފަންޑުކޮށް އިނާމެއް ހުށަހެޅިކަމަށް ނުބެލެވޭ ކަމަށެވެ. އަދި މިއީ ފިކުރީ ތަފާތެއްގެ ސަބަބުން އަމިއްލައަށް ރާވައި ހިންގިކަމަށް ބެލެވޭ ހަމަލާއެއް ކަަމަށްވެސް ފުލުހުން ބުންޏެވެ. އެހެންނަމަަވެސް ހަމަލާއަށް ތައްޔާރުވާން 18،000 ރުފިޔާގެ ސައިކަލެއް ގަނެ، ބޮން ހެދުމަށް އެޕާޓްމެންޓު ކުއްޔަށް ނެގިކަމަށް ތަހުގީގަށް އެނގިފައިވާކަމަށްވެސް ފުލުހުން ބުންޏެވެ.
ޕީޖީ ޝަމީމް މިއަދު ވިދާޅުވީ މި 10 މީހުންނާއި ހަމައިން ތަހުގީގު ނިންމައިނުލާ ކަމަށާއި ތަހުގީގު އަދިވެސް އިތުރަށް ކުރިއަށް ދާނެ ކަމަށެވެ.
