މިހިނގާ ޖުލައި މަހުގެ ކަރަންޓު ބިލުތައް ބޮޑުވީ ވަކި ސަރުކާރަކާއި ހެދިއޭ ނުދަންނަވާ ކަމަށް އެމްޑީޕީ ޕާލަމެންޓަރީ ގްރޫޕުގެ ލީޑަރު އަދި މެދުހެންވޭރު ދާއިރާގެ މަޖިލިސް މެމްބަރު އަލީ އާޒިމް ވިދާޅުވެއްޖެ އެވެ.
މާލެ ސަރަހައްދުގައި ކަރަންޓު ބިލުތައް ބޮޑުވެ އެކަމުގެ ޝަކުވާ ގިނަ ބަޔަކު ދަނީ ސޯޝަލް މީޑިއާގައި އުފުލަމުންނެވެ. މިމައްސަލަ ޔުޓިލިޓީ ރެގިއުލޭޓަރީ އޮތޯރިޓީންވެސް ބަލަން ފަށާފައިވާއިރު ސްޓެލްކޯއިން ބުނާ ގޮތުގައި އެކަން އެގޮތަށް ދިމާވީ އެކުންފުނީގެ މައްސަލައަކުން ނޫނެވެ.
މިކަމާއި ގުޅިގެން އާޒިމް މިއަދު ވިދާޅުވީ ކުރިން ވިދާޅުވި އެއްޗެއް އަދި އެއްފަހަރު ބައްލަވަން އެދޭކަމަށެވެ. އަދި ވިދާޅުވީ ނިމިދިޔަ މަހުގެ ކަރަންޓު ބިލު ބޮޑުވީ ވަކި ސަރުކާރަކާއި ހެދިއޭ އެއްފަހަރުވެސް ނުދަންނަވާ ކަމަށެވެ.
"އެކްޓިވިސްޓުން ނޫސްވެރިންނޭ ކީމަ ވާގޮތް މީ. އުއްމީދު ކަނޑައެއް ނުލަން. ރަނގަޅުވާނެ"
- އަލީ އާޒިމް
ނޫސްވެރިން މާނަ އޮޅުވާލައި ހަބަރު ފެތުރީކަމަށް އާޒިމް ވިދާޅުވި ނަަމަވެސް މާލެ ސިޓީގެ މޭޔަރު ޑރ. މުހައްމަދު މުއިއްޒު، މާލޭގެ ރައްޔިތުންނަށް ދައްކަން އުނދަގޫވާވަރުގެ ބޮޑު ކަރަންޓު ބިލެއް މިމަހު އައިސްފައިވާކަމަށް ވިދާޅުވުމުން އެކަމަށް ރައްދު ދެއްވައި އާޒިމް މީގެ ކުރިން ވިދާޅުވީ "މިއަދު މި ޖެހޭ އުނދަގުލާ ތަކުލީފަކީ އިއްޔެ ކަން ކުރިގޮތުން ވާގޮތް" ކަމަށެވެ.
އިތުރަށް ތަފްސީލު ކޮށްދެއްވަމުން ވިދާޅުވީ ކަރަންޓު ބިލުތައް ބޮޑުވީ ޑރ. މުއިއްޒުވެސް އިންނެވި ކެބިނެޓަކުން ދެކޮޅު ނުޖެހޭ އިގްތިސޯދީ ގިނަ ނިންމުންތަކެއް ނިންމުމުގެ ސަބަބުން ކަމަށެވެ. މި އިބާރާތުގައި އާޒިމް ކުށްވެރި ކުރައްވާފައި މިވަނީ ކުރީ ސަރުކާރުގެ ސިޔާސަތުތަކެވެ. އެހެންކަމުން އާޒިމް މި ވިދާޅުވީ ކަރަންޓު ބިލުތައް މިއަދު ބޮޑުވެގެން ދާ ދިޔުމުގައި ރައީސް އިބްރާހިމް މުހައްމަދު ސޯލިހުގެ ސަރުކާރުގެ ކުށެއް ނެތް ކަމަށާއި ކުރީގެ އިގްތިސޯދީ ސިޔާސަތުގެ ސަބަބުން މިއަދު ކަރަންޓު ބިލުތައް ބޮޑުވީ ކަމަށެވެ.
މިއަދު މިޖެހޭ އުނދަގުލާ، ތަކުލީފަކީ އިއްޔެ ކަންކުރިގޮތުން ވާގޮތެއް.
އެކަން އެގޮތައް ދިމާމިވަނީ މަނިކުފާނު އިން ކެބިނެޓަކުން ދެކޮޅުނުޖެހޭ އިގްތިޟާދީ ގިނަ ނިންމުންތަކެއް ނިންމުމުގެ ސަބަބުން.
އިރާދަފުޅުން މާދަމައަކީ މާރަގަޅުދުވަހަކަށް ހަދާނަން. https://t.co/ladHlMzcWe— 𝐀𝐥𝐢 𝐀𝐳𝐢𝐦 (@aliaazim) July 29, 2021
އާޒިމް މިފަދައިން ވިދާޅުވިއިރު ރައީސް ސޯލިހު ވެރިކަމުގައި ހުންނަވާތާ 3 އަހަރު ވަނީ އެވެ. މީގެ ކުރިންވެސް ގިނަ މައްސަލަތަކެއްގައި މިސަރުކާރަށް ނިސްބަތްވާ ބޭފުޅުން ކަންކަން ހައްލު ނުވުމުގެ ސަބަބެއްގެ ގޮތުގައި ދައްކަނީ "ކުރީ ސަރުކާރު" ބަހަނާ އެވެ.
