ގެއްލިގެން ހޯދަމުން ދިޔަ އަހުމަދު ނައުފަލް ނަމަކަށް ކިޔާ ޒުވާނާ ހަ ދުވަސް ފަހުން ފެނިއްޖެ އެވެ.
މައުލޫމާތު ލިބިފައިވާ ގޮތުގައި ނައުފަލް ފެނުނީ މިއަދު ހަވީރު 4:45 ހާއިރު މާލޭ، ޗާންދަނީ މަގުގައި ހުންނަ ރޮމްބަސް ފިހާރަ ކުރިމަތިންނެވެ.
ފުލުހުން ބުނީ ނައުފަލް މިވަގުތު ހުރީ ފުލުހުންގެ ބެލުމުގެ ދަށުގައި ކަމަށާއި އޭނާގެ ހާލު ރަނގަޅުކަމަށެވެ. އެހެންނަމަވެސް 6 ދުވަސް ވަންދެން ނައުފަލް އުޅުނު ތަނަކާއި އޭނާއަށް ވީގޮތެއް އަދި ސާފެއް ނުވެ އެވެ.
އދ. ކުނބުރުދާއަށް އުފަން ނައުފަލް ގެ އުމުރަކީ 26 އަހަރެވެ. އޭނާ ގެއްލިގެން ހޯދަން ފެށީ މިމަހުގެ 26 ވަނަ ދުވަހުގެ ފަހުން ހަބަރެއް ނުވެގެންނެވެ. އާއިލާއިން އެކަން ފުލުހުންނަށް އެންގުމުން ފުލުހުންވެސް އޭނާ ހޯދަން އިއުލާން ކުރި އެވެ.
ނައުފަލް މާލެ އައީ މިމަހުގެ 20 ވަނަ ދުވަހު ޑޮކްޓަރަށް ދައްކާށެވެ. ނައުފަލް ހޯދުމަށް އާއިލާއިން ވަނީ މާލޭގެ އެކި ގެސްޓް ހައުސްތަކާއި ހޮސްޕިޓަލްތައްވެސް ބަލައިފަ އެވެ. އޭނާ މާލެ އައި ދުވަހު ނޫން އަނެއް ދުވަހު ހުޅުމާލޭގައި ހުންނަ ޓްރީ ޓޮޕް ހޮސްޕިޓަލަށް ޑޮކްޓަރަށް ދެއްކި ކަމަށް އާއިލާއިން ބުނެފައި ވެއެވެ.
ނައުފަލް މާލެ އައިސް ހުންނާނެ ކަމަށް އާއިލާ ކައިރީގައި ބުނީ ރައްޓެއްސަކާއިއެކު އެވެ.
