ރައީސުލްޖުމްހޫރިއްޔާގެ ރަސްމީ ގެކޮޅު، މުލިއާގެ ގޮއްވާލާނެ ކަމުގެ އިންޒާރު ދިން މީހާގެ ބަންދަށް ކޯޓުން 15 ދުވަސް ދީފި އެވެ.
މުލިއާގެ ކައިރިއަށް ގޮސް އެތަން ގޮއްވާލާނެކަމުގެ އިންޒާރު ދީގެން ދެ މީހަކު ހައްޔަރު ކުރީ މިދިޔަ ޖުލައި މަހުގެ 9 ވަނަ ދުވަހު އެވެ. އެ ދެ މީހުން މުލިއާގެ ކައިރީގައި ތިބެ އެމީހުންގެ އަތުގައި އޮތް ފޮއްޓެއްގެ ތެރޭގައި ބޮމެއް އޮތް ކަަމަށް ބުނެ އަޑުގަދަ ކޮށްފައި ވެއެވެ. އަދި ބޮން ގޮއްވާލާނެ ކަމުގެ އިންޒާރު ތަކުރާރުކޮށް ދިނެވެ.
މިކަމާއި ގުޅިގެން ސިފައިންނާއި ފުލުހުން ވަނީ ހާއްސަ އޮޕަރޭޝަނެއް ކުރިއަށް ގެންގޮސްފަ އެވެ. އެ އޮޕަރޭޝަންގައި ދެމީހުން ހައްޔަރުކޮށްފައި ވެ އެވެ. އެހެންނަމަވެސް އެދުވަހުގެ ރޭ އޭގެ ތެރެއިން އެކަކު ދޫކޮށްލި އެވެ. ދެވަނަ މީހާ އަދިވެސް ހުރީ ހައްޔަރުގަ އެވެ.
ފުލުހުން މީގެ ކުރިން ބުނެފައިވަނީ އެދެމީހުންނަކީވެސް މަސްތުވާތަކެތީގެ ރެކޯޑު އޮންނަ ދެމީހުންނެވެ. މުލިއާގެ ކައިރިއަށް އިންޒާރު ދޭން ދިޔައީ ރިހެބުން ނިކުމެގެން ކަމަށްވެސް ފުލުހުންގެ ތަހުގީގަށް ވަނީ އެނގިފަ އެވެ.
މިމައްސަލައިގައި މިހާރުވެސް ހައްޔަރު ކޮށްފައި ހުރި މީހާގެ ބަންދަށް އެންމެ ފުރަތަމަ ދިނީ ހަތް ދުވަހެވެ. އޭގެ ފަހުން މިދިޔަ މަހުގެ 18 ވަނަ ދުވަހު އިތުރު 14 ދުވަސް ބަންދަށް އިތުރު ކުރި އެވެ.
ހައްޔަރުކޮށްފައި ހުރި މީހާގެ މައްޗަށް ފުލުހުން ކުރަނީ ޓެރަރިޒަމްގެ އަމަލެއް ހިންގާނެ ކަމުގެ އިންޒާރު ދިނުން ނުވަތަ ބިރު ދެއްކުމުގެ ތުހުމަތާއި ބިރު ދެއްކުމާއި ދޮގު ހަބަރު ދިނުމުގެ ތުހުމަތެވެ.
މީގެ ކުރިން ފުލުހުން ވަނީ ރައްޔިތުންގެ މަޖިލިސް ގޮއްވާލާނެ ކަމަށް ބުނެ ސޯޝަލް މީޑިއާގައި އިންޒާރު ދިން މީހެއްގެ މައްސަލަވެސް ބަލައިފަ އެވެ.
