ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން އުފުލާފައިވާ ރިޝްވަތު ނެގުމާއި މަނީ ލޯންޑާ ކުރުމުގެ ކުށުގެ ދައުވާ ސާބިތުކުރަން އެމަނިކުފާނާއި ދެކޮޅަށް ދައުލަތުން 86 ހެކި ހުށަހަޅައިފި އެވެ.
މިއަދު ކްރިމިނަލް ކޯޓުގައި އޮތް އިބްތިދާއީ އަޑު އެހުމުގައި ރައީސް ޔާމީންގެ މައްޗަށް އުފުލާފައިވާ ދެ ދައުވާއަކީ ރ. ފުއްގިރި ކުއްޔަށް ދޫކުރި މައްސަލައިގައި ކުރާ ދެ ދައުވާ އެވެ. އެ ދައުވާގައި ބުނާ ގޮތުން ރިޝްވަތު ނަގާފައިވަނީ ފުއްގިރީގައި ރިސޯޓެއް ހަދަން އެރަށް ކުއްޔަށް ދޫކޮށްގެން މއ. ކުރިކީލަހިޔާ، އަހްމަދު ކްރިކް ރިޒާ މެދުވެރިކޮށެވެ. އަދި މަނީލޯންޑާ ކޮށްފައިވަނީ ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުން ކޮށްގެންނެވެ.
މި ދެ ދައުވާ ސާބިތުކުރަން ދައުލަތުން ރައީސް ޔާމީނާއި ދެކޮޅަށް ހުށަހަޅާފައިވާ ޝަފައީ ހެކިންގެ ތެރޭގައި ކުރީގެ ނައިބު ރައީސް އަހުމަދު އަދީބު އަބްދުލްޣަފޫރާއި، އެމްއެމްޕީއާރްސީގެ އޭރުގެ މެނޭޖިން ޑިރެކްޓަރު އަބްދުﷲ ޒިޔަތުގެ އިތުރުން ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު އަދި ކެނދިކުޅުދޫ ދާއިރާގެ ކުރީގެ މެމްބަރު އަލީ މައުރޫފް ހިމެނެ އެވެ.
މީގެ އިތުރުން ދައުލަތުން ވަނީ ކިތާބީ ހެކިންގެ ގޮތުގައި ބެންކު ސްޓޭޓްމެންޓުތަކާއި އެދުވަސްވަރު ޓޫރިޒަމް މިނިސްޓްރީއާއި އެމްއެމްޕީއާރުސީ އާއި ދެމެދު ކުރެވުނު މުއާމަލާތްތައްވެސް ހުށަހަޅައިފަ އެވެ.
ރައީސް ޔާމީންގެ ދިފާއުގައިވެސް މިއަދު ވަނީ 30 ހެއްކެއް ހުށަހަޅައިފަ އެވެ. ޝަފައީ ހެކިންގެ ތެރޭގައި މާލެ ސިޓީގެ ޑެޕިއުޓީ މޭޔަރު އަހުމަދު ނަރީޝް އާއި ސިޔާމްގެ އިތުރުން އަހުމަދު ކްރިކް ރިޒާ ހިމެނެ އެވެ. ދެން ހުށަހެޅީ ކިތާބީ ހެއްކެވެ.
ފުއްގިރި މައްސަލައިގައި ކްރިކް ރިޒާގެ މައްޗަށްވެސް ވަނީ ދައުވާ ކޮށްފަ އެވެ. އެއީ މަނީ ލޯންޑަރ ކުށުގެ ދައުވާ އާއި ރިޝްވަތު ދިނުމުގައި މެދުވެރިއަކަށް ވުމުގެ ކުށުގެ ދައުވާ އެވެ. މީގެ އިތުރުން ސަންގެ ކުންފުނިތަކަށްވެސް މަނީ ލޯންޑަރ ކުރުމުގެ ކުށުގެ ދައުވާ ވަނީ އުފުލައިފަ އެވެ.
ޝަރީއަތުގެ މިއަދުގެ އަޑު އެހުން ފަށަމުން ރައީސް ޔާމީންގެ ފަރާތްޕުޅުން ދިފާއީ ވަކީލު އަދި ކުރީގެ ނާއިބު ރައީސް ޑރ. މުހައްމަދު ޖަމީލް އެދިވަޑައިގެންފައި ވަނީ އޭސީސީން 2017 ވަނަ އަހަރު އެމްއެމްޕީއާރުސީއާ ގުޅޭގޮތުން ހިންގި ބޮޑު ތަހުގީގުގެ ރިޕޯޓްގައި ހިމެނޭ ލިޔެކިޔުންތައް ހޯދުމަށެވެ. އެ ރިޕޯޓްގައި އެ މައްސަލައާ ރައީސް ޔާމީނާ ގުޅުމެއް އޮތް ކަމަށް އޭސީސީން ބުނެފައި ނުވާ ކަމަށް ވިދާޅުވި އެވެ. އަދި އެ ލިޔެކިޔުންތަކަކީ ދައުވާއިން ބަރީއަވާނެކަން ސާބިތުވާނެ ލިޔެކިޔުންތަކެއްް ކަމަށް ވެސް ވިދާޅުވި އެވެ. އެ ލިޔެކިޔުންތައް ބޭނުންވާ ކަމަށް ބުނެ ކޯޓަށް ވަނީ ސިޓީއެއް ވެސް ފޮނުވާފަ އެވެ.
އެހެންނަަމަވެސް ދައުލަތުން ވަނީ އެލިޔެކިޔުންތަކަށް މީގެ ކުރިން ޖަވާބުދާރީ ވެފައިވާކަމަށް ބުނެ އެކަމާއި ދެކޮޅު ހަދައިފަ އެވެ. މިއާއެކު މައްސަލަ ބައްލަވާ އިސް ގާޒީ އަހުމަދު ޝަކީލް ނިންމެވީ އެ ލިޔެކިޔުންތައް ހޯދަން އަމުރެއް ނެރެވޭނީ އުސޫލުތަކުގެ ތެރެއިން ފޯމު މެދުވެރިކޮށް އެކަމަށް ހުށަހެޅުމުން ކަމަށެވެ. އެހެންކަމުން ފޯމު ހުށަހަޅައިގެން ލިޔެކިޔުން ހޯދަން ތިން ދުވަހުގެ މުއްދަތެއް ގާޒީ ދެއްވި އެވެ.
މިމައްސަލައިގެ ޝަރީއަތް ފެށުމުގެ ކުރިން ހުށަހެޅުންތައް ހުށަހަޅަން ކޯޓުން މިއަދު ވަނީ ދެފަރާތައްވެސް 10 ދުވަހުގެ މުއްދަތެއް ދީފަ އެވެ. އިތުރު އަޑުއެހުމެއް ތާވަލުކޮށްފައިވަނީ މިމަހުގެ 22 ވަނަ ދުވަހަށެވެ.
ފުއްގިރި މައްސަލައިގައި ރައީސް ޔާމީންގެ މައްޗަށް ދެ ދައުވާއެއް އުފުލާފައިވާއިރު މީގެ ކުރިންވެސް އެމްއެމްޕީއާރުސީ ހިޔާނާތަކާއި ގުޅިގެން މަނީ ލޯންޑަރ ކުރުމުގެ ކުށް ސާބިތުވެ އެމަނިކުފާނުގެ މައްޗަށް ވަނީ 5 އަހަރުގެ ޖަލު ހުކުމެއް އިއްވައިފަ އެވެ. އެ ޖަލު ހުކުމް މިހާރު ގެންދަވަނީ ތަންފީޒު ކުރައްވަމުންނެވެ.
