ކޮވިޑް-19 ހާލަތު ރަނގަޅުވުމާއިއެކު މޮނިޓަރިން ހާލަތު އުވައިލިތާ ހަތަރު ދުވަސްފަހު އަނެއްކާވެސް ގއ. ވިލިނގިލި މޮނިޓަރިންއަށް ލައިފި އެވެ.
އެރަށް އަނެއްކާވެސް މޮނިޓަރިންއަށް ލާފައިވަނީ ބަލީގެ އަލާމާތްތައް ފެނިގެން ފްލޫ ކްލިނިކަށް ދެއްކި މީހަކު ޕޮޒިޓިވްވުމުންނެވެ. ޕޮޒިޓިވްވި މީހާ އެރަށަށް ދިޔައީ މިދިޔަ ޖުލައި މަހުގެ 28 ވަނަ ދުވަހު ކަމަށް މައުލޫމާތު ލިބެ އެވެ.
މޮނިޓަރިން ހާލަތަށް ގެންދިޔުމަށްފަހު ވިލިނގިލީގައި މިހާރު ދަނީ ކޮންޓެކްޓް ޓްރޭސިންގެ މަސައްކަތް ކުރަމުންނެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މޮނިޓަރިންއަށް ލަނީ ރަށުގައި ކޮމިޔުނިޓީ ސްޕްރެޑެއް އޮވެދާނެކަން ޝައްކުވެ، ނުވަތަ އެފަދަ ކަމެއް އޮތްނަމަ އެވެ. ކޮންޓެކްޓް ޓްރޭސިންގެ މަސައްކަތަށްވެސް މޮނިޓަރިން ހާލަތަށް ގެންދެ އެވެ. އެހެންނަމަވެސް ކޮމިޔުނިޓީ ސްޕްރެޑެން ނެތްނަމަ އެހާލަތު އިތުރަށް ދެމިއެއް ނޯންނާނެ އެވެ.
ވިލިނގިލި އެންމެ ފުރަތަމަ މޮނިޓަރިން ހާލަތަށް ގެންދިޔައީވެސް ރެންޑަމް ސާމްޕަލްތަކެއް ޕޮޒިޓިވްވުމާއި ގުޅިގެންނެވެ.
