ގެއްލިފައިވާ މަރިޔަމް ޝިމާގެ ތަހުގީގަށް ހުރަސްއަޅަނީ ކާކުތޯ، މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ސުވާލު އުފައްދައިފި އެވެ.
2019 ވަނަ އަހަރުގެ ފެބުރުއަރީ މަހުގެ ތެރޭގައި ވީނުވީއެއް ނޭނގި ގެއްލުނު ޝިމާގެ ތަހުގީގު ދެ އަހަރަށްވުރެއް ގިނަ ދުވަސް ވީއިރުވެސް ފުރިހަމަ ކުރެވިފައެއް ނުވެ އެވެ. ޝިމާއަށް ވީނުވީގޮތެއް އަދިވެސް ނޭނގޭއިރު އޭނާ ހޯދުމުގައި މިހާ ގިނަ ދުވަސް ހޭދަވާތީ ސަރުކާރަށް އޮތީ ފާޑު ކިޔުން އަމާޒުވެފަ އެވެ.
މެމްބަރު އާދަމް ޝަރީފު މިއަދު ކުރެއްވި ޓުވީޓެއްގައި ވަނީ ޝިމާއަށް ވީގޮތެއް މިހާ ގިނަ ދުވަސް ވީއިރު ނޭނގުނީ ކީއްވެތޯ ސުވާލު އުފައްދައިފަ އެވެ. އަދި އެކަމަށް ހުރަސް އަޅަނީ ކާކުތޯވެސް އޭނާ ސުވާލު ކުރެއްވި އެވެ.
މީގެ އިތުރުުން އާދަމް ޝަރީފު ވަނީ މި ވެރިކަމުގައި މިގޮތަށް ގެއްލިފައިވާ އަދި އިހުމާލުވެފައިވާ މީހުންގެ ވާހަކަ ނުދައްކަނީ ކީއްވެތޯވެސް ސުވާލު އުފައްދައިފަ އެވެ.
"މަރު ކޮމިޝަން އަށް މި ސަރުކާރުގެ ވެރިން ހާޒިރު ކުރާނެ ދުވަސް ދުރެއް ނޫން، އިންޝާ ﷲ"
- މެމްބަރު އާދަމް ޝަރީފު އުމަރު
އާދަމް ޝަރީފު މިފަދައިން ވިދާޅުވިއިރު ނޫސްވެރިޔާ އަހުމަދު ރިލްވާނު ގެއްލުވައިލި މައްސަލައިގެ ތަހުގީގަށް ހުރަސް އެޅުއްވިކަމުގެ ތުހުމަތުގައި، ކުރީގެ ރައީސް އަބްދުﷲ ޔާމީން ހާޒިރު ކުރަން މަރު ކޮމިޝަނުން ވަނީ އެމަނިކުފާނަށް އަންގައިފަ އެވެ. އެހެންނަމަވެސް ރިލްވާނުގެ މައްސަލައާއި ރައީސް ޔާމީނާއި އެއްވެސް ގުޅުމެއް ނެތްކަމަށް މީގެ ކުރިން މަރުކޮމިޝަނުން ވަނީ ބުނެފަ އެވެ.
މަރު ކޮމިޝަނުން ބޭއްވި ނޫސްވެރިންގެ ބައްދަލުވުމެއްގައި ހުސްނު ސުއޫދު ވިދާޅުވީ ރިލްވާނުގެ މައްސަލައިގައި މިހާތަނަށް ހިންގި ތަހުގީގުގައި ރައީސް ޔާމީނާއި އެމައްސަލައާއި އެއްވެސް ގުޅުމެއް ނެތްކަމަށާއި، އެމައްސަލައިގައި އެމަނިކުފާނުގެ މައްޗަށް އެއްވެސް ދައުވާއެއްވެސް ނުކުރެވޭނެ ކަމަށެވެ.
