ގާނޫނު ރަނގަޅަށް ހިނގާނަމަ ޔޫތު މިނިސްޓަރު އަހުމަދު މަހުލޫފާއި އައްޑޫ ސިޓީގެ މޭޔަރު އަލީ ނިޒާރުމެންފަދަ ބޭބޭފުޅުން މަގާމުގައި ނުތިބޭނެ ކަމަށް ކުރީގެ ނައިބު ރައީސް އަދި މަޝްހޫރު ގާނޫނީ ވަކީލު ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ޖަމީލު މިފަދައިން ވިދާޅުވީ ފޭދޫ ހިއްކި ބިމުގައި ބަހައްޓާފައި ހުރި ބޮޑު ހިލަތަެއް އިންޑިއާގެ "ހިލޭ އެހީ" ގެ ދަށުން އަޅާ ޕޮލިސް އެކެޑަމީއަށް ގެންދާތީ އައްޑޫ ރައްޔިތުން ނިކުމެ ނިޒާރުގެ އިސްތިއުފާއަށް ގޮވި ހާދިސާއަށް އިޝާރާތް ކުރައްވަ އެވެ.
ޖަމީލު ވިދާޅުވީ އައްޑޫ ރައްޔިތުން އިއްޔެ ނިކުމެ ނިޒާރުގެ އިސްތިއުފާއަށް ގޮވުމަކީ މާ ބޮޑު ކަމެއް ކަމުގައި ދެކި ނުލައްވާ ކަމަށެވެ. އަދި ވިދާޅުވީ ގާނޫނު ރަނގަޅަށް ހިނގާނަމަ މިނިސްޓަރު މަހުލޫފާއި ނިޒާރުމެންފަދަ ބޭބޭފުޅުން މަގާމުގައި ނުތިބޭނެ ކަމަށެވެ.
"މިނިސްޓަރު މަހުލޫފާއި ނިޒާރުމެންފަދަ މީހުންނަށް ރައްޔިތުން އަތުން މުސާރަ ނެގޭތީ ޕީޖީ ހުސައިން ޝަމީމަށް ޝުކުރު އަދާކުރަންޖެހޭ"
- ޑރ. މުހައްމަދު ޖަމީލު އަހުމަދު
ޖަމީލު މިފަދަ މޭރުމަކުން ވާހަކަފުޅު ދެއްކެވިއިރު އައްޑޫ އިކުއިޓޯރިއަލް ހޮސްޕިޓަލްގެ އިރުމަތީ ފާރާތާއި ހުޅަނގު ފަރާތުން ދޫކޮށްފައިވާ ގޯތިތައް ނެގުމަށް އައްޑު ސިޓީ ކައުންސިލުން ގަވާއިދާ ހިލާފަށް ނިންމިކަމުގެ ތުހުމަތުތައް ނިޒާރުގެ މައްޗަށް އަންނަނީ ކުރެވެމުންނެވެ. އަދިި އެމައްސަލަ ބައްލަވަމުން ގެންދަވާ އިސް ފަނޑިޔާރު އަލީ ހާޝިމްއާއި ނިޒާރު ބައްދަލުކުރެއްވިކަމުގެ މައްސަލައެއް ފެންމަތިވެ މަގާމުގެ ނުފޫޒު ބޭނުންކުރާކަމުގެ ތުހުމަތުތަކެއްވެސް ކުރެވެ އެވެ.
ފަނޑިޔާރު އަލީ ހާޝިމްގެ މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ) އަށްވެސް ވަނީ ހުށަހަޅައިފަ އެވެ.
މީގެ އިތުރުން ޔޫތު މިނިސްޓަރު މަހުލޫފާއި ނިޒާރު އެމްއެމްޕީއާރުސީ ހިޔާނާތުގައި ބައިވެރިވިކަން އެސެޓް ރިކަވަރީ ކޮމިޝަންގެ ތަހުގީގަށް ފާހަގަކުރެވި ހިޔާނާތުގެ ލިސްޓު އާންމު ކުރިއިރު ދެބޭފުޅުންގެ ނަންވެސް ވަނީ ހިމަނައިފަ އެވެ.
މަހުލޫފުގެ މައްޗަށް ދައުވާކޮށްދިނުމަށް އެދި އޭސީސީއަށް ފޮނުވި ނަމަވެސް ގިނަ ދުވަސްތަކެއް ވެގެން ދާއިރުވެސް އެކަމަށް ގޮތެއް ނުނިންމަ އެވެ. މުސާރަ ލިބޭ ގޮތަށް މަަގާމުގެ މަސްއޫލިއްޔަތުތަކުން މަހުލޫފު ސަސްޕެންޑުކޮށްފައި ހުންނަވާތާ ދެ މަސްދުވަސް ވާން ވަނީ ކައިރިވެފަ އެވެ.
