މިދިޔަ މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓު ހަމަލާއާއި ގުޅިގެން ހަތަރު މީހެއްގެ މައްޗަށް ދައުވާ އުފުލައިފި އެވެ.
އެކަން ހާމަކުރައްވާފައިވަނީ ކޮމިޝަނާ އޮފް ޕޮލިސް މުހައްމަދު ހަމީދު މިއަދު ކުރެއްވި ޓުވީޓެއްގަ އެވެ. ހަމީދު ވަނީ ބޮމުގެ ހަމަލާގައި ބައިވެރިވި ފުލުހުންގެ ޓީމަށް ސާބަސް ދަންނަވައިފަ އެވެ.
ހަތަރު މީހުންނަށް ދައުވާ އުފުލިއިރު އެއީ ކޮން ހަތަރު މީހުންނެއް ކަމެއް އަދި އެމީހުންގެ މައްޗަށް ކުރާ ދައުވާގެ ތަފްސީލެއް ހަމީދު ނުދެއްވަ އެވެ.
ބޮމުގެ ހަމަލާގެ ތަހުގީގުގައި އިތުރު ޕްރޮސެކިއުޝަން ނިންމުންތަކެއް ނިންމާފައިވާ ކަމަށް ޕީޖީ ހުސައިން ޝަމީމް އިއްޔެ ވަނީ ވިދާޅުވެފަ އެވެ. އެކަމުގެ ތަފްސީލު ދެއްވުމަށް މިއަދު މެންދުރު ފަހު 2:00 ގައި ނޫސްވެރިންގެ ބައްދަލުވުމެއް ބާއްވަން ވަނީ ތާވަލުކޮށްފަ އެވެ.
ނަޝީދަށް ދިން ހަމަލާއާއި ގުޅިގެން އެންމެ ފުރަތަމަ ދައުވާ ކޮށްދިނުމަށް އެދި ފުލުހުން ޕީޖީއަށް ފޮނުވީ އަހުމަދު އަދުހަމް އާއި މުޖާޒް އަހްމަދު އާއި ތަހުމީން އަހްމަދު ގެ އިތުރުން އަހުމަދު ފާތިހުގެ މައްޗަށެވެ. އޭގެ ފަހުން އަލީ ހައިޝަމްގެ މައްޗަށްވެސް ދައުވާ ކުރަން ފޮނުވި އެވެ.
ނަޝީދަށް ދިން ހަމަލާއާއި ގުޅިގެން ހައްޔަރު ކުރީ 10 މީހުންނެވެ. އޭގެ ތެރެއިން ދައުވާ ކުރަން ފޮނުވާފައި ނުވަނީ މ. ކުދެހިގޭ، އިސްހާގާއި ގއ. ވިލިނގިލީ، ހުދުރުމާގޭ، ފަހުމީ އަލީ އާއި އއ. މާޅޮސް، އަސަރީގޭ މުހައްމަދު ނާޒިމާއި ހއ. ހޯރަފުށީ އަލަނާސިގޭ މުހައްމަދު ތަސްލީމް އަދި ހއ. މޮޅަދޫ، ބަހާރުގޭ އަބްދުﷲ އަލިމަނިކުގެ މައްޗަށެވެ.
