ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާއާއި ގުޅިގެން، ބޮން ގޮއްވައިލި ރިމޯޓު އޮޕަރޭޓު ކުރި އަހުމަދު އަދުހަމް ކުށަށް އިއުތިރާފުވެ، 23 އަހަރުގެ ޖަލު ހުކުމެއް އަންނަ ގޮތަށް އެއްބަސްވުމެއް ހަދައިފި އެވެ.
ރައީސް ނަޝީދަށް ދިން ބޮމުގެ ހަމަލާގެ ތަހުގީގާއި ގުޅިގެން ޕްރޮސެކިއުޓާ ޖެނެރަލް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި ޕީޖީ ހުސައިން ޝަމީމް ވިދާޅުވީ ޖިނާއީ އިޖުރާއަތުގެ ގާނޫނުގެ ދަށުން އަދުހަމް އޭނާގެ ކުށަށް އިއުތިރާފުވެފައިވާ ކަމަށާއި އެއްބަސްވުމުގެ ދަށުން އޭނާ މި ހަމަލާގެ ތަހުގީގަށް އެއްބާރުލުން ދޭނެ ކަމަށެވެ.
އަދުހަމްގެ މައްޗަށް ދައުލަތުން ކުރާ ދައުވާތަކަކީ ޓެރަރިޒަމްގެ އަމަލެއް ކުރުން، ޓެރަރިޒަމްގެ އަމަލެއް ކުރަން ރޭވުން، ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މަރާލަން އުޅުން އަދި ޓެރަރިސްޓް ޖަމާއަތަކަށް ތާއީދުކުރުމުގެ ދައުވާ އެވެ. މި ދައުވާތައް ސާބިތުވެއްޖެނަމަ އަދުހަމްގެ މައްޗަށް 40 އަހަރުގެ ޖަލު ހުކުމެއް އަންނާނެ އެވެ. އެހެންނަމަވެސް ދައުލަތާއިއެކު ހެދި އެއްބަސްވުމުގެ ދަށުން ޖަލު ހުކުމް ވަނީ 23 އަހަރަށް ކުޑަކުރެވިފަ އެވެ.
އަދުހަމް އަކީ ބޮން ގޮއްވައިލަން ރިމޯޓު ކޮންޓްރޯލްކުރި މީހާ އެވެ. އަދި ސައިކަލުގައި ބޮން ހަރުކުރީވެސް އޭނާ އެވެ.
އަދުހަމްގެ އިތުރުން ބޮން ގޮއްވި މައްސަލައިގައި އިތުރު ތިން މީހެއްގެ މައްޗަށް ވަނީ ދައުވާ ކޮށްފަ އެވެ. އެއީ މުޖާޒު މުހައްމަދާއި، ތަހުމީނު އަހުމަދުގެ އިތުރުން އަލީ ހައިޝަމްގެ މައްޗަށެވެ.
