ދިއެފްއެމްގެ ކުރީގެ ސީއީއޯ މަސްއޫދު ހިލްމީއަށް ހަމަލާ ދިން މައްސަލައިގައި މީހަކު ހައްޔަރުކޮށްފި އެވެ.
ލ. ފޮނަދޫގައި ހިނގި މި ހާދިސާގައި މަސްއޫދަށް ހަމަލާ ދީފައިވަނީ އޭނާ ސައިކަލުގައި ދުއްވާފައި ދަނިކޮށެވެ. ސޯޝަލް މީޑިއާގައި އާންމުކޮށްފައިވާ ވީޑިއޯ ނަގާފައިވަނީ ސައިކަލުގެ ފަހަތުގައި އިން މަސްއޫދުގެ އަނބިކަނބަލުންނެވެ.
ފުލުހުން ބުނީ ދަގަނޑު ބުރިއަކުން މީހަކަށް ހަމަލާ ދީ މާރާމާރީ ހިންގާފައިވާ މައްސަލައެއް ރޭ 9:15 ހާއިރު ފުލުހުންނަށް ހުށަހެޅުމާއި ގުޅިގެން ކޯޓު އަމުރެއްގެ ދަށުން އުމުރުން 36 އަހަރުގެ ދިވެހި ފިރިހެނަކު ރޭ ދަންވަރު 2:20 ހާއިރު ހައްޔަރުކޮށްފައިވާ ކަމަށެވެ.
ފޮނަދޫގައި އާއިލާއާއިއެކު މިހާރު ދިރިއުޅުއްވާ މަސްއޫދަށް މީގެ ކުރިންވެސް އެމީހާގެ ފަރާތުން އެކި ފަހަރު މަތިން އިންޒާރު ލިބިފައިވެ އެވެ. އެގޮތުން މަސްއޫދުގެ ކާރުގައިވެސް މީގެ ކުރިން ރޯކޮށްލާފައި ވެއެވެ. އެމައްސަލަ ކޯޓަށް ހުށަހެޅި ނަމަވެސް މައްސަލަ ނިމިގެން ދިޔައީ ކުށް ސާބިތު ނުވެގެންނެވެ.
ރޭ ހިންގި މާރާމާރީގައި ދަގަނޑު ބުރިއަކުން ޖަހަން ދިމާކުރީ މަސްއޫދުގެ ބޮލުގަ އެވެ. އެހެންނަމަވެސް ދިފާއުގައި އަތް ނެންގެވުމުން މަސްއޫދުގެ އަތް ވަނީ ފަޅައިގެން ގޮސްފަ އެވެ. ހޮސްޕިޓަލުގައި މަސްއޫދަށް ފަރުވާވެސް ދިނެވެ.
ކުރިން މީޑިއާގައި މަސައްކަތް ކުރި މަސްއޫދު މިހާރު ގެންދަވަނީ ލ. އަތޮޅުގައި ވިޔަފާރިއެއް ހިންގަވަމުންނެވެ.
