ކުރީގެ ރައީސް މައުމޫނު އަބްދުލް ގައްޔޫމު، 2018 ވަނަ އަހަރުގެ ރިޔާސީ އިންތިހާބުގެ ކެމްޕެއިނަށް ފައިސާ ނަންގަވައި އެފައިސާ އަނބުރާ ދައްކަވާފައި ނުވާތީކަމަށް ވިދާޅުވެ ކާށިދޫ ދާއިރާގެ މެމްބަރު އަބްދުﷲ ޖާބިރު މއ. ކިނބިގަސްދޮށުގެއަށް ވަޑައިގެން އެގޭ ކުރިމަތީގައި ބަޔާނެއް އިއްވައިފި އެވެ.
ޖާބިރު ބަޔާން އިއްވާ މަންޒަރު ފެންނަ ވީޑިއޯއެއް ސޯޝަލް މީޑިއާގައި މިއަދު ވަނީ އާންމުކޮށްފަ އެވެ. އެ ވީޑިއޯއިން ފެންނަ ގޮތުގައި ބަޔާން އިއްވުމުގެ ކުރިން ޖާބިރު ވަނީ ކިނބިގަސްދޮށުގޭ ދޮރޯށި މަތީގައި އޮތް ވެޔޮގަނޑެއް ހަލާކުކޮށްލައިފަ އެވެ.
އެއަށްފަހު ގޭގެ ނަންބޯޑު އަރާނެހެން ދޮރު ކުރިމަތީގައި ހުއްޓިވަޑައިގެން ޖާބިރު ވިދާޅުވީ މިއަދުން ފެށިގެން އޭނާ އެ ހުންނެވީ ކިނބިގަސްދޮށުގެއާއި ހަވާލުވެވަޑައިގެންކަމަށެވެ. އަދި ވިދާޅުވީ އަދުލު އިންސާފު ގާއިމް ކުރުމުގެ ނިޒާމުގެ ތެރެއިން އިންސާފު ލިބިވަޑައިނުގެންނެވުމުން އަމިއްލަފުޅަށް އިންސާފު ގާއިމް ކުރައްވާނެ ކަމަށެވެެ. ޖާބިރު މީގެ ކުރިންވެސް ވަނީ މައުމޫނު 29 މިލިއަން ރުފިޔާ ނެންގެވިކަމަށް ވިދާޅުވެފަ އެވެ.
ޖާބިރު އިއްޔެ ވަނީ ރައްޔިތުންގެ މަޖިލީހުގެ ކުރިމައްޗަށް ވަޑައިގެން އެތަނުގައި ގިނިކަންޏާ އިހުތިޖާޖު ކުރައްވައިފަ އެވެ. މަޖިލީހުގެ ދޮރޯށި ކުރިމަތީގައި އިށީންދެވަޑައިގެން އިންނަވައި ރައީސް އިބްރާހިމް މުހައްމަދު ސޯލިހު މަޖިލީހަށް ހާޒިރު ކުރަން ޖެހޭ ކަމަށާއި ޑިފެންސް މިނިސްޓަރު މާރިޔާ އިސްތިއުފާ ދެއްވުމަށްވެސް ގޮވައިލެއްވި އެވެ. ޖާބިރު ހުއްޓުވުމަށް އަނބިކަނބަލުން ދިޔާނާ ސައީދު ވަޑައިގެންނެވުމުންވެސް އެތަނުން ތެދުވެވަޑައިނުގެންނެވުމުން ދިޔާނާ އެތަނުން ވަޑައިގެންނެވީ އެވެ.
