ކުރީގެ ރައީސް މައުމޫނު އަބްދުލް ގައްޔޫމު މީހުންނަށް ދީފައިވާ ގެއްލުންތައްވެސް ބަލަންޖެހޭ ކަމަށް ކުރީގެ ބަންޑާރަ ނައިބު ދިޔާނާ ސައީދު ވިދާޅުވެއްޖެ އެވެ.
ދިޔާނާގެ ފިރިކަލުން އަދި ކާށިދޫ ދާއިރާގެ މެމްބަރު އަބްދުﷲ ޖާބިރު އިއްޔެ ވަނީ މައުމޫނުގެ ގެކޮޅު، ކިނބިގަސްދޮށުގެއަށް ވަޑައިގެން އެގޭގައި ހައްދާފައިވާ ވެޔޮގަނޑަކަށް ގެއްލުން ދީފަ އެވެ. މައުމޫނު ދީފައިވާ ގެއްލުންތައް ބަަލަންޖެހޭކަމަށް ދިޔާނާ ވިދާޅުވީ ޖާބިރުގެ މައްސަލަ ބަލަމުން ދާކަމަށް ފުލުހުން ބުނުމާއި ގުޅިގެންނެވެ.
ދިޔާނާ ވިދާޅުވީ ކިނބިގަސްދޮށުގެއަށް ޖާބިރު ގެއްލުމެއް ދީގެން އެ މައްސަލަ ފުލުހުން ބަލާނަމަ ރައީސް މައުމޫން، ޖާބިރަށް ދީފައިވާ ގެއްލުމުގެ މައްސަލަ ވެސް ބަލަންވާނެ ކަމަށެވެ. ދިޔާނާ ވިދާޅުވީ މައުމޫނު ޖާބިރަށް ދިން ގެއްލުމުގެ މައްސަލަ ފުލުހުންނަށް ހުށަހެޅިތާ އެތައް ދުވަހެއް ވެފައިވާ ކަމަށެވެ.
"މައުމޫނަށް ލިބިވަޑައިގެންނެވި ގެއްލުމެއް ވިއްޔާ ބެލިފަ، މައުމޫނު މީހުންނަށް ދެއްވާ ބޮޑެތި ގެއްލުންތައް ނުބެލޭ ގޮތަށް އޮތުމަކީ ގޯހެއް"
- ދިޔާނާ ސައީދު
2018 ވަނަ އަހަރުގެ ރިޔާސީ އިންތިހާބުގެ ކެމްޕެއިނަށް ޖާބިރު އަތުން މައުމޫނު 29 މިލިއަން ރުފިޔާ ނެންގެވިކަމަށް ޖާބިރު ގެންދަވަނީ ތުހުމަތު ކުރައްވަމުންނެވެ. އެކަން މައުމޫނު ދޮގު ކުރެއްވި ނަމަވެސް ޖާބިރު ވިދާޅުވަނީ އެފައިސާ އަނބުރާ ދެއްވަން މައުމޫނަށް ޖެހިވަޑައިގަންނަވާނެ ކަމަށެވެ. ޖާބިރު އެ މައްސަލަ ކޯޓަށްވެސް ހުށަހެޅުއްވި އެވެ.
އިއްޔެ ޖާބިރު ވިދާޅުވީ ފައިސާ ނުދެއްވާނަމަ ކިނބިގަސްދޮށުގެ ޖާބިރާއި ހަވާލު ކުރައްވަންޖެހޭ ކަމަށެވެ. އަދި ކޯޓުން އިންސާފު ނުލިބުމުން ދެން އިންސާފު ހޯއްދަވާނީ އަމިއްލަފުޅަށްކަމަށްވެސް ޖާބިރު ވިދާޅުވި އެވެ.
