ކުރީގެ ރައީސް އަބްދުﷲ ޔާމީންގެ ސަރުކާރުން މާލޭގައި ތަރައްގީ ކުރި އިންޑަސްޓްރިއަލް ވިލެޖު ތަރައްގީ ކުރާނެ ގޮތަކާއި ގުޅޭގޮތުން މާލެ ރައްޔިތުންގެ ހިޔާލު ހޯދަން މާލެ ސިޓީ ކައުންސިލުން ނިންމައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ ކުރީގެ ސަރުކާރުން ޕްލޭން ކުރީ އެ ސަރަހައްދަށް މާލޭގެ ގަރާޖުތަކާއި ވޯކްޝޮޕްތަކާއި ގުދަންތައް ފަދަ ތަންތަން ބަދަލުކުރަން ކަމަށެވެ. އެހެންނަމަވެސް މި ސަރުކާރުން އިންޑަސްޓްރިއަލް ވިލެޖާއިމެދު ގެންގުޅެނީ އެހެން ސިޔާސަތެއް ކަމަށް މުއިއްޒު ވިދާޅުވި އެވެ. އެގޮތުން އެ ސަރަހައްދު މުނިފޫހިފިލުވުމަށް ބޭނުން ކުރުމަށް މި ސަރުކާރުން ނިންމާފައިވާކަމަށް މުއިއްޒު ވިދާޅުވި އެވެ.
މުއިއްޒު ވިދާޅުވީ އެސަރަހައްދު ތަރައްގީ ކުރާނެ ގޮތެއް ނިންމާނީ ރައްޔިތުންނާއި މަޝްވަރާ ކުރުމަށްފަހު ކަމަށެވެ.
ސިޓީ ކައުންސިލުން ވަނީ މިރޭ 8:30 ގައި ގަލޮޅުގެ ރައްޔިތުންނާއި ބައްދަލުކުރަން ނިންމައިފަ އެވެ. ބައްދަލުވުން އޮންނާނީ ބާ އިންޖީނުގެ ކުރިން ހުރި ސަރަހައްދުގަ އެވެ. މީގެ އިތުރުން ވިލިމާލެ ރައްޔިތުންނާއި ބައްދަލު ކުރާނީ މިމަހުގ 8 ވަަނ ދުވަހުގެ ރޭ 8:30 ގައި ވިލިމާލެ ފުޓުބޯޅަ ދަނޑުގަ އެވެ.
މައްޗަންގޯޅީގެ ރައްޔިތުންނާއި ބައްދަލުކުރާނީ މިމަހުގެ 10 ވަނަ ދުވަހުގެ ރޭ 8:30 ގައި މާފަންނު ސްޓޭޑިއަމް ޓާފް ދަނޑުގަ އެވެ. އަދި މާފަންނު ރައްޔިތުންނާއި މިމަހު 12 ވަނަ ދުވަހުގެ ރޭ 8:30 ގައި ރަސްފަންނުގައި ބައްދަލުކުރަން ތާވަލު ކުރިއިރު ހެންވޭރު ރައްޔިތުންނާއި ބައްދަލުކުރާނީ މިމަހުގެ 14 ވަނަ ދުވަހުގެ ރޭ 8:30 ގައި ލޮނުޒިޔާރާތް ޕާކުގަ އެވެ.
މިއަދުގެ ނޫސްވެރިންގެ ބައްދަލުވުމުގައި މުއިއްޒު ވިދާޅުވީ މާލެއާއި ތިލަފުއްޓާ ގުޅޭ ބްރިޖުގެ މަޝްރޫއު ފެށޭކަމަށްވާނަމަ އެ ބްރިޖުގެ މަޝްރޫއުގެ ކޮންސްޓްރަކްޝަން ސައިޓަކަށް އިންޑަސްޓްރިއަލް ވިލެޖުން އެކަށީގެންވާ ސައިޒުގެ ބިމެއް ސަރުކާރަށް ބޭނުންވާނެކަމަށެވެ. އަދި އެހެންކަމުން އެސަރަހައްދުން ބިމެއް އެކަމަށް ދޭން ޖެހޭނެކަމަށް ވިދާޅުވި އެވެ.
މާލެ ރައްޔިތުންނާއިއެކު ބާއްވާ ބައްދަލުވުންތަކުގައި މާލޭގެ ތަރައްގީއާއި ގުޅޭ އެހެން ކަންކަމުގައިވެސް ހިޔާލު ހޯދާނެކަމަށް މުއިއްޒު ވިދާޅުވި އެވެ. އެގޮތުން މާލޭގައި ސްކޫލު ބަހާއި އަދި ޕަބްލިކް ބަހުގެ ހިދުމަތް ގާއިމުކުރުމާއި، ޕާކިން ފެސިލިޓީތައް ގާއިމުކުރާ ތަންތަނާއި އަދި މުޅި މާލެ ވައިފައިކޮށް ސީސީޓީވީ ކުރަން ނިންމި ޕްލޭނަށްވެސް ހިިޔާލު ހޯދާނެ ކަމަށް މުއިއްޒު ވިދާޅުވި އެވެ.
