ކޮވިޑް-19 ދިފާއު ވެކްސިން ފުރިހަމަ ނުކޮށް ދަތުރުކުރާ ފަރާތްތަކުން ކަރަންޓީނު މުއްދަތު ހަމަކުރުމަށްފަހު ހަދާ ޓެސްޓަށް ފައިސާ ދައްކަން ޖެހޭ ގޮތަށް ހަދައިފި އެވެ.
އެކަން އިއުލާންކުރީ ހެލްތު އިމަޖެންސީ އޮޕަރޭޝަންސް ސެންޓަރުން މިއަދު ބޭއްވި ނޫސްވެރިންގެ ބައްދަލުވުމެއްގަ އެވެ. އެބައްދަލުވުމުގައި ވެކްސިން ނުޖަހާ ފަރާތްތަކުން ރަށްރަށަށް ދަތުރު ކުރާއިރު ކަރަންޓީނު ވާންޖެހޭނެ ކަމަށާއި އެ ފަރާތްތަކުން ކަރަންޓީނުގެ މުއްދަތު ހަމަކުރުމަށްފަހު ހަދާ ރިލީޒް ސާމްޕަލްއަށް ފައިސާ ދައްކަން ޖެހޭނެ ކަމަށެވެ. އަދި މި އުސޫލު ތަންފީޒު ކުރަން ފަށާނީ އަންނަ ސެޕްޓެމްބަރު މަހުގެ 1 ވަނަ ދުވަހުން ފެށިގެން ކަމަށްވެސް ނަޒްލާ ވިދާޅުވި އެވެ.
"ވެކްސިން ނުޖަހާ ބަލި އުޅޭ ރަށަކުން ދަތުރު ކުރާ ފަރާތްތައް އެބަ ޖެހޭ ކަރަންޓީންވާން، މިހާރު މި އޮތް އުސޫލުން، ކުރިއަށް އޮތްތަނުގައިވެސް ކަރަންޓީންވާން ޖެހޭނެ، އެހެން ނަމަވެސް ކަރަންޓީންވެފައި މި ނަގާ ރިލީސް ސުންކު އެކެއް ސެޕްޓެމްބަރުން ފެށިގެން މި ވެކްސިން ނުޖަހާ ފަރާތްތަކުން ދަތުރުކޮށްފައި، މި ނަގާ ސުންކުތަކަށް އަމިއްލަ ހަރަދުގައި ނަގަން ޖެހޭ ގޮތަށް މި ވަނީ ހަމަޖެހިފައި"
- ޑރ. ނަޒްލާ
އެޗްއީއޯސީން މިގޮތަށް ނިންމާފައި މިވަނީ ވެކްސިން ޖެހުމަށް ބާރު އެޅުމުގެ ގޮތުންނެވެ. ރާއްޖޭގެ ބޮޑު ބައެއް ވެކްސިން ފުރިހަމަކުރިނަމަވެސް 21 އިންސައްތަ މީހުން އަދިވެސް ވެކްސިންގެ އެއްވެސް ޑޯޒްއެއް ނުޖަހަ އެވެ.
