އިދިކޮޅު ޕީޕީއެމް / ޕީއެންސީގެ މަސްލަހަތު އޮންނަ ޓީވީ ޗެނަލް، "ޗެނަލް 13" ގެ ޕްރޮގުރާމެއްގެ މައްސަލަ މޯލްޑިވްސް ބްރޯޑްކާސްޓިންގް ކޮމިޝަނުން ބަލަން ފަށައިފި އެވެ.
އެ ކޮމިޝަނުން ބުނީ ބަލަން ފަށާފައިވަނީ ޗެނަލް 13 އިން ގެނަސްދިން "ހަޖަމް" ކިޔާ ޕްރޮގުރާމެއްގައި ގެނަސްދިން ކޮންޓެންޓެއްގެ މައްސަލަ ކަމަށެވެ. އެމައްސަލަ ބްރޯޑްކޮމްއިން މައްސަލަތައް ބެލުމުގައި ގެންގުޅޭ އިޖުރާއަތްތަކާއި އެއްގޮތަށް ބަލަމުން ދާކަމަށް ބުންޏެވެ.
ހަޖަމް ޕްރޮގުރާމުގައި ގެނަސްދިން ކޮންޓެންޓެއް ބްރޯޑްކޮމްގެ ސަމާލުކަމަށް ރޭ އައިސްފައިވާކަމަށް އެ ކޮމިޝަނުން ބުނިއިރު ސަމާލުކަމަށް ގެނައީ ކޮން ފަރާތަކުން ކަމެއް ހާމައެއް ނުކުރެ އެވެ. ވަކި ފަރާތަކުން އެމައްސަލަ ހުށަހެޅީ ކަމެއް ނުވަތަ ބްރޯޑްކޮމްއިން އަމިއްލައަށް އިސް ނަގައިގެން އެމައްސަލަ ބަލަން ނިންމީކަމެއްވެސް ހާމައެއް ނުކުރެ އެވެ.
"މީގެ އިތުރުން ހުރިހާ ބްރޯޑްކާސްޓަރުންވެސް، ބްރޯޑްކާސްޓު ކުރުމުގެ ސުލޫކީ މިންގަނޑު އަދި އުސޫލުތައް ހިފެހެއްޓުމަށްވެސް މި ކޮމިޝަނުން ނަސޭހަތްތެރިވަން" - ބްރޯޑްކޮމްއިން އިތުރަށް ބުންޏެވެ.
ބްރޯޑްކާސްޓިން ކޮމިޝަންގައި އަބަދުވެސް ތިއްބަވަނީ އެއިރެއްގައި އޮންނަ ސަރުކާރަށް މަސްލަހަތު ހިފޭ ބޭފުޅުންނެވެ. މެމްބަރުންގެ ގޮތުގައި މަޖިލީހުން ފާސްކުރަނީ މަޖިލީހުގެ މެޖޯރިޓީ އޮންނަ ސިޔާސީ ޕާޓީއަކުން ރުހޭ ބޭފުޅުންނެވެ. މިހެންކަމުން އިދިކޮޅުގެ މަސްލަހަތު އޮންނަ މީޑިއާތަކުގެ މައްސަލަތައް އަބަދުވެސް ކޮމިޝަނުން ބަލަ އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި އޭރުގެ އިދިކޮޅު ހަބަރުތައް ގެނަސްދިން ރާއްޖެ ޓީވީގެ ގިނަ މައްސަލަތަކެއް ބަލައި ޖޫރިމަނާވެސް ކުރި އެވެ. ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެން މިހާރުގެ އިދިކޮޅު މަސްލަހަތު އޮންނަ ޗެނަލް 13 ގެ ގިނަ މައްސަލަތަކެއް ވަނީ މިހާތަނަށްވެސް ބަލައިފަ އެވެ.
މައްސަލަ ބެލިޔަސް ފިޔަވަޅެއް ނޭޅޭ.