ރާއްޖެއިން ދަރަނީގެ ގޮތުގައި ނަގާފައިވާ ލޯނުތަކަށް މިއަަހަރުގެ މިހާތަނަށް 626.9 މިލިއަން ރުފިޔާ ދައްކާފައިވާކަމަށް ފިނޭންސް މިނިސްޓްރީން ބުނެފި އެވެ.
ފިނޭންސް މިނިސްޓްރީން އާންމުކުރި ތަފާސް ހިސާބުތައް ދައްކާ ގޮތުން މި އަދަދަކީ މިދިޔަ މަހުގެ ނިޔަލަށް ދަރަނި އަދާކުރަން ދެއްކި ފައިސާ އެވެ. މިދިޔަ އަހަރުގެ މިމުއްދަތުގައި ލޯނުތަކަށް ދެއްކީ 628 މިލިއަން ރުފިޔާ އެވެ.
އެކި ބޭނުންތަކަށް ރާއްޖެއިން ބޭރުންނާއި އެތެރެއިން ނަގާފައިވާ ލޯނުތައް ދެއްކުމަށް މިއަހަރަށް ބަޖެޓު ކޮށްފައިވަނީ 1،469.9 މިލިއަން ރުފިޔާ އެވެ.
ރާއްޖެއިން ނަގާފައިވާ ޖުމްލަ ދަރަނި މިދިޔަ އަހަރުގެ ތިންވަނަ ކުއާޓަރުގެ ނިޔަލަށް ހުރީ 79.8 ބިލިއަން ރުފިޔާގަ އެވެ. އޭގެ ތެރެއިން ބޭރުގެ ދަރަނީގެ ގޮތުގައި ހުރީ 38 ބިލިއަން ރުފިޔާ އެވެ. އަދި އެތެރޭގެ ދަރަންޏަކީ 41 ބިލިއަން ރުފިޔާ އެވެ. ރާއްޖެއިން ނެގި ލޯނުތަކުގެ އަދަދަށް ބަލާއިރު އެއީ އުފެއްދުންތަރިކަމުގެ ނިސްބަތުން 138 އިންސައްތަ އެވެ.
ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެންނެވިއިރު އެންމެ ގިނަ އަދަދެއްގެ ދަރަނި އޮތީ ޗައިނާއިން ނަގައިފަ އެވެ. އެހެންނަމަވެސް އެމަނިކުފާނުގެ ސަރުކާރުން ގިނަ އަދަދެއްގެ ލޯނު ވަނީ އިންޑިއާއިން ނަގައިފަ އެވެ. ހާއްސަކޮށް ކޮވިޑް-19 ގެ ސަބަބުން ރާއްޖޭގެ އިގްތިސޯދަށް ކުރިމަތިވި ގޮންޖެހުންތަކާއިއެކު އިންޑިއާއިން ނެގި ލޯނުތަކުގެ އަދަދު ވަނީ ވަރަށް ބޮޑުތަނުން މައްޗަށް ގޮސްފަ އެވެ.
ކޮވިޑުގެ ހާލަތާއި ގުޅިގެން ރައީސް ސޯލިހުގެ ސަރުކާރުން ގެންދަނީ މާލޭގެ ގިނަ އިމާރާތްތަކެއް ސުކޫކު ކުރުމަށްފަހު ލޯނު ނަގަމުންނެވެ. މިހާތަނަށް އައިއިރު އެންމެ ބޮޑު އަދަދެއްގެ ފައިސާ ސަރުކާރުން ނެގީ ކުރީގެ ރައީސް އަބްދުﷲ ޔާމީންގެ ސަރުކާރުން މާލޭގައި ތަރައްގީކުރި ދަރުމަވަންދަ ހޮސްޕިޓަލް އިމާރާތުގެ 25 ބުރި ސުކޫކު ކޮށްގެންނެވެ. މީގެ އިތުރުން އޮލިމްޕަސް އިމާރާތް ހިމެނޭގެ ބައެއް ބޮޑެތި ތަންތަން ސުކޫކު ކުރުމަށް ސަރުކާރުން ވަނީ ނިންމައިފަ އެވެ.
