ކޮވިޑް-19 ގެ ސަބަބުން މިސްކިތުގައި ޖަމާއަތް ހަދާއިރު ގައިދުރު ކުރަން މަޖުބޫރު ކޮށްފައި އޮތް އޮތުން ނިމުމަކަށް ގެނަސް، އެ އުސޫލު އުވާލައިފި އެވެ.
އިސްލާމިކް މިނިސްޓްރީން އިއްޔެ ބުނީ ނަމާދުގެ ޖަމާއަތުގައި ގައިދުރު ކުރުމާއި، ގުނޫތު ކިޔުން މިއަދުގެ ފަތިސް ނަމާދުން ފެށިގެން ނިމުމަކަށް ގެންނަން ނިންމާފައިވާ ކަަމަށެވެ.
ޖަމާއަތުގައި ނަމާދު ކުރާއިރު ގައިދުރު ކުރަން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނިންމީ ކޮވިޑް-19 ގެ ހާލަތު މާލެ ސަރަހައްދުގައި ވަރަށް ބޮޑަށް ގޯސްވުމާއި ގުޅިގެން އިސްލާމިކް މިނިސްޓްރީގެ ލަފާގެ މަތިންނެވެ.
އެ އުސޫލު އުވައިލަން ނިންމާފައި މިވަނީ މާލެ ސަރަހައްދުގައި ގިނަ ބަޔަކަށް ކޮވިޑް ދިފާއު ވެކްސިން ދީ، ބަލީގެ ހާލަތު މި ސަރަހައްދުގައި ވަރަށް ބޮޑަށް ރަނގަޅުވެފައި ވަނިކޮށެވެ.
އިސްލާމިކް މިނިސްޓްރީން ވަނީ ނަމާދުގައި ގުނޫތު ކިޔުން ހުއްޓައިލިނަމަވެސް ފަރުޟު ފަސް ނަމާދަށް ހުރިހާ ފަރާތްތަކުންވެސް ފަރުވާތެރިވުމަށް އިލްތިމާސް ކޮށްފަ އެވެެ.
ކޮވިޑް-19 ގެ ތިންވަނަ ރާޅާއިއެކު މާލެ ސަރަހައްދުގައި ޖަމާއަތުގައި ނަމާދު ކުރުން ހުއްޓައިލީ މިދިޔަ ފެބުރުއަރީ މަހުގެ ތެރޭގަ އެވެ. އޭގެ ފަހުން ޖަމާއަތުގައި ނަމާދު ކުރަން ފެށިނަމަވެސް ނަމާދު ކުރީ ގައިދުރުކޮށްގެންނެވެ.
