12 އަހަރު ނުވެ މަސްކޮޅެއް އިން ކުޑަކުދިންނަށް ކޮވިޑް-19 ވެކްސިން ނުދެވޭނެ ކަމަށާއި ވެކްސިން ދެވޭނީ 12 އަހަރު ފުރުމުން ކަމަށް އައިޖީއެމް ހޮސްޕިޓަލުގެ ކުޑަކުދިންގެ ހާއްސަ ޑޮކްޓަރު، ޑރ. އަހުމަދު ފައިސަލް ވިދާޅުވެއްޖެ އެވެ.
12 އަހަރާއި 17 އަހަރާއި ދެމެދުގެ ކުދިންނަށް ވެކްސިން ދޭން ސަރުކާރުން ވަނީ ނިންމައިފަ އެވެ. އެގޮތުން އެ އުމުރުފުރާގެ ކުދިންނަށް ދޭނީ ފައިޒާ ވެކްސިނެވެ.
މިކަމާއި ގުޅިގެން ޑރ. ފައިސަލް ވިދާޅުވީ ވެކްސިން ދޭނީ 12 އަހަރުން މަތީގެ ކުދިންނަށް ކަމަށާއި އޭގެ ތެރޭގައި ވަކި ބަލިތަކެއް ހުރި ކުދިންވެސް ހިމެނޭ ކަމަށެވެ. އޭގެ ތެރޭގައި ނޭވާ ހިއްލާ، ހަމުގެ މައްސަލަ، ފިޓު ޖެހޭ، ތެލެސީމާ، G6PD ދަށްމ ސީޕީ، ސިކްލްސެލް އަދި ހެނދުނު ހޭލައިގެން ކިނބިހި އެޅުންފަދަ ބަލިތައް ހުންނަ ކުދިންްވެސް ހިމެނޭ ކަމަށް ވިދާޅުވި އެވެ.
ޑރ. ފައިސަލް ވިދާޅުވީ ވެކްސިން ދޭނީ ބަލި ކުއްޖަކު އެ ބައްޔަކުން ރަނގަޅުވީމާ ކަމަށެވެ.
ރާއްޖެއަށް ފައިޒާ ވެކްސިންގެ އިތުރު ޝިޕްމެންޓު ލިބޭނެކަމުގެ ޔަގީންކަން ސަރުކާރަށް ލިބިފައިވާއިރު އެޑިއުކޭޝަން މިނިސްޓްރީން މަސައްކަތް ކުރަމުން ދަނީ ކުރިއަށް އޮތް ތަނުގައި ސްކޫލުތަކުގައި ހާއްސަ ވެކްސިން ޕްރޮގުރާމެއް ފަށައިގެން ކުރިއަށް ގެންދާށެވެ.
