ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދާއިއެކު، އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ސިއްރު ޑީލެއް ހައްދަވާނެ ގޮތް ނޯންނާނެ ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ރައީސް ނަޝީދާއިއެކު ރައީސް ޔާމީން ސިއްރު ޑީލެއް ހައްދަވާފައިވާކަމަށް ކުރީގެ ހޯމް މިނިސްޓަރު އުމަރު ނަސީރު އިއްޔެ ވަނީ ވިދާޅުވެފަ އެވެ. އެވާހަކަތަކަށް ރައްދު ދެއްވަމުން އަދުރޭ ވިދާޅުވީ ރައީސް ޔާމީނަކީ އެއްވެސް ބޭފުޅަކާއިއެކު ސިއްރު ޑީލް ހައްދަވާނެ ބޭފުޅެއް ނޫންކަމަށެވެ.
"އަމުދުން ރައީސް ނަޝީދާއެކު ރައީސް ޔާމީން ހައްދަވާނެ ޑީލެއް ނޯންނާނެ"
- އަބްދުއްރަހީމް އަބްދުﷲ
އަދުރޭ ވިދާޅުވީ ރާއްޖޭގެ ސިޔާސީ މައިދާނުގައި އެއްގޮތެއްގައި ސާބިތުވެ ހުންނެވި ހަަމައެކަނި ލީޑަރަކީ ރައީސް ޔާމީން ކަމަށެވެ. އަދި އެކަން ރައްޔިތުންނަށް ވަރަށް ސާފު ކަމަށްވެސް އޭނާ ވިދާޅުވި އެވެ.
ރާއްޖޭގައި ފުޅާ ދާއިރާއެއްގައި ފެތުރެމުންދާ ހަރުކަށި ފިކުރު ނައްތައިލުމަށް ރައީސް ޔާމީނާއި ޕީޕީއެމްގެ އެހީތެރިކަން ހޯއްދަވާނެ ކަމަށް ރައީސް ނަޝީދު ވަނީ ވިދާޅުވެފަ އެވެ. އެމަނިކުފާނު ވިދާޅުވީ މިމައްސަލައަށް އެދެވޭ ހައްލެއް ގެނެވޭނީ ސިޔާސީ ހުރިހާ ފިކުރެއްގެ މީހުން އެއްގަލަކަށް އަރައިގެން ކަަމަށެވެ.
އެހެންނަމަވެސް ރައީސް ނަޝީދާއި އެމްޑީޕީއާއެކު މަސައްކަތް ކުރެއްވުމަށް އިދިކޮޅުން ވަނީ ދެކޮޅު ހަދައިފަ އެވެ. އިދިކޮޅުން ބުނީ އެމްޑީޕީއާއެކު ކުރާނެ ސިޔާސީ މަސައްކަތެއް ނޯންނާނެ ކަމަށެވެ.
