މިދިޔަ މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގެ ތަހުގީގުގެ ފުރަތަމަ ބައި ނިމިފައިވާ ކަމަށާއި ފުލުހުން ދެން ފަށާނީ ހަމަލާއަށް ފަންޑު ކުރި މީހަކު ނުވަތަ ބަޔަކު ހޯދިމުގެ ތަހުގީގު ކަމަށް ހަމަލާގެ ކަންކަން ބެއްލެވުމަށް ރައީސް އިބްރާހިމް މުހައްމަދު ސޯލިހު ކަނޑައެޅުއްވި މަންދޫބު އައްބާސް ފާއިޒު ވިދާޅުވެއްޖެ އެވެ.
ރައީސް ނަޝީދަށް ދިން ހަމަލާއާއި ގުޅިގެން 10 މީހަކު ވަނީ ހައްޔަރުކޮށްފަ އެވެ. އޭގެ ތެރެއިން ހަތަރު މީހަކަށް ވަނީ ދައުވާވެސް ކޮށްފަ އެވެ. އަދި އެކަކަށް ދައުވާ ކުރަން ވަނީ ޕީޖީއަށް ފޮނުވައިފަ އެވެ.
އައްބާސް ފާއިޒު ވިދާޅުވީ ތަހުގީގުގެ ފުރަތަމަ ބައި މިހާރު ނިމިފައިވާ ކަމަށާއި އެެހެންކަމުން ދެން މިމައްސަލައިގައި އިސްކަން ދޭނީ ހަމަލާއަށް ފައިސާ ހޯދި ގޮތް ވީއެންމެ އަވަހަށް ހޯދުމަށްކަމަށެވެ.
އިތުރަށް އައްބާސް ފާއިޒު ވިދާޅުވީ ޝަރީއަތް ހުޅުވާލައިގެން ކުރިއަށް ގެންދިޔުމަށް ޕީޖީ ހުސައިން ޝަމީމް ގޮވާލައްވާފައިވުމުން އެކަމަށް ތާއީދު ކުރައްވާ ކަމަށެވެ.
އައްބާސް ފާއިޒަކީ އިނގިރޭސިވިލާތުގެ ރައްޔިތެކެވެ. ރައީސްގެ ހާއްސަ މަންދޫބެއްގެ ގޮތުގައި މޭ ހައެއްގެ ހަމަލާގެ ކަންކަން ބެއްލެވުމަށް އޭނާ ކަނޑައެޅުއްވީ މެއި މަހުގެ 19 ވަނަ ދުވަހު އެވެ.
