އިތުރަށް މުސާރަ ޖަމާވި 100 އެއްހާ ސިއްހީ ދާއިރާގެ މުވައްޒަފުންގެ މުސާރަ ހިފަހައްޓަން ފިނޭންސް މިނިސްޓްރީން ބޭންކުތަކަށް އަންގައިފި އެވެ.
ސަރުކާރު މުވައްޒަފުންނަށް އިއްޔެ މުސާރަ ޖަމާކުރިއިރު ސިއްހީ ދާއިރާގައި މަސައްކަތް ކުރާ ބައެއް މުވައްޒަފުންނަށް ބޮޑެތި އަދަދުތަކުން ވަނީ ފައިސާ ޖަމާކުރެވިފަ އެވެ. އެގޮތުން ބައެއް މުވައްޒަފުންނަށް 70.000 ރުފިޔާ އަދި ބައެއް މުވައްޒަފުންނަށް 94،000 ރުފިޔާވެސް ވަނީ މުސާރައިގެ ގޮތުގައި އޮޅުމަކުން ޖަމާ ކުރެވިފަ އެވެ.
އެ ފައިސާ ޖަމާކުރެވުމުން އެއީ އޮޅިގެން ޖަމާކުރެވިފައިވާ ފައިސާ ކަމަށް ބުނެ މުވައްޒަފުންނަށް އެކަން ވަނީ އަންގައިފަ އެވެ.
އިއްޔެ އޮޅިގެން ފައިސާ ޖަމާކުރިއިރު ބައެއް މުވައްޒަފުންނަށް ލިބެންޖެހޭ މުސާރައަށްވުރެއް ކުޑަ އަދަދެއްވެސް ޖަމާކޮށްފައިވެ އެވެ. އެމުވައްޒަފުންނަށް ހަމަ އަގު ދޭނެކަން ފަހުން ވަނީ އަންގައިފަ އވެެ.
ފިނޭންސުން ބުނީ އޮޅިގެން އިތުރަށް ފައިސާ ޖަމާކުރެވުނު މުވައްޒަފުންގެ ފައިސާ ހިފަހައްޓަން ބޭންކުތަކަށް އަންގާފައިވާ ކަމަށެވެ. އަދި ބޭންކުތަކާއި ގުޅިގެން އެކަން ހައްލު ކުރުމުގެ މަސައްކަތް ކުރަމުން ދާކަމަށްވެސް ފިނޭންސް މިނިސްޓްރީން ބުންޏެވެ.
