ކެފޭ އުސޫލުން ޑްރަގް ވިއްކާ ގެއެއްގެ ވެރިފަރާތުގެ މައްޗަށް ޕްރޮސެކިއުޓާ ޖެނެރަލް އޮފީހުން މިއަދު ދައުވާ ކޮށްފި އެވެ.
ކްރިމިނަލް ކޯޓުގައި މިއަދު ދައުވާ ކުރީ ހުސައިން ޔޫސުފް ކިޔާ މީހެއްގެ މައްޗަށެވެ. ޕީޖީ އޮފީހުން މިއަދު ބުނީ މ. ބްރައިޓްފްލާވާ ގޭގައި އެގޭގެ ވެރިމީހާ ހުސައިން ޔޫސުފް، ކެފޭ އުސޫލުން ޑްރަގް ވިއްކައި ވިޔަފާރިކުރުމަށް ހުއްދަ ދީފައިވާ ކަމަށެވެ.
އިތުރަށް ޕީޖީ އޮފީހުން ބުނީ އެގޭގައި ކެފޭ އުސޫލުން ޑްރަގް ވިއްކައި ވިޔަފާރިކުރާ ކަމަށް ތުހުމަތުކުރެވުނު މައްސަލާގައި، އެ ގޭގައި މީހުން މަސްތުވާތަކެތި ބޭނުންކޮށް، އެ ތަކެތީގެ ވިޔަފާރިކޮށް، އެ ތަކެތި ޕެޑްލް ކުރާ ކަމަށް ގަބޫލުކުރެވޭ ކަމަށެވެ. ޕީޖީ އޮފީހުން ބުނެފައި ވަނީ މި މައްސަލައިގައި މ. ބްރައިޓްފްލާވާގައި އެކަން ހުއްޓުވުމަށް އެންގުމުންވެސް ވެރިފަރާތުން އެކަން ހުއްޓުވާފައި ނުވާ ކަމަށެވެ.
ހުސައިން ޔޫސުފުގެ މައްޗަށް ޕީޖީ އޮފީހުން އުފުލާފައިވަނީ މަސްތުވާތަކެއްޗާ ބެހޭ ގާނޫނުގެ ދަށުން ގެއެއް ނުވަތަ އިމާރާތެއް ނުވަތަ ގެއަކުން ނުވަތަ އިމާރާތަކުން ބައެއް، ގާނޫނުގައިވާ މަސްތުވާއެއްޗެއް، ޓްރެފިކްކުރުމަށް ނުވަތަ ޕެޑެލްކުރުމަށް ނުވަތަ އުފެއްދުމަށް ނުވަތަ އެއިން ކަމެއް ކުރުމަށް ކަމަށް ގަބޫލުކުރެވޭ ހާލު، ނުވަތަ އެގޮތަށް ގަބޫލުކުރާނެ ފުރުސަތު އޮވެ، އެ ތަނެއްގެ ވެރިފަރާތުން ނުވަތަ އެތަނެއްގައި އުޅޭ ފަރާތުން ނުވަތަ އެ ތަނެއްގެ މަސްއޫލިއްޔަތު އުފުލާ ފަރާތުން ހުއްދަ ދިނުން ނުވަތަ ހުއްދަކުރުމުގެ ކުށުގެ ދައުވާ އެވެ.
މިއީ ކެފޭ އުސޫލުން މާލޭގައި މަސްތުވާތަކެތި ވިއްކާ މައްސަލައިގައި މަސްތުވާތަކެތީގެ ގާނޫނުގެ ދަށުން ގެއެއްގެ ވެރިފަރާތުގެ މައްޗަށް ދައުވާކުރެވުނު ފުރަތަމަ ފަހަރުކަން ފާހަގަކޮށްލެވެ އެވެ.
