މާލޭގައި ހުންނަ އެމްޑީޕީ އޮފީސް ތެރޭގައި މިއަދު ހިންގި މާރާމާރީގައި، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް ނަސީމްގެ މަންމައަށް ބޮޑެތި އަނިޔާތަކެއް ލިބިއްޖެ އެވެ.
މިކަން މީކާއިލް ވަނީ ސޯޝަލް މީޑިއާގައި ކަށަވަރުކޮށްދެއްވައިފަ އެވެ. އޭނާ ވިދާޅުވީ މަންމަގެ ހާލު މިހާރު ރަނގަޅު ކަމަށެވެ.
މީކާއިލް ވިދާޅުވީ އެމްޑީޕީ އޮފީހުގައި ހިންގި މާރާމާރީގައި އޭނާގެ މަންމައަށް އަނިޔާވިނަމަވެސް މި ހަމަލާއަކީ ސީދާ އޭނާއަށް އަމާޒުކޮށް ދިން ހަމަލާއެއް ނޫން ކަމަށެވެ. އަދި ވިދާޅުވީ މިއީ ސިޔާސީ ހަމަލާއެއްކަމަށްވެސް ގަބޫލު ނުކުރެވޭ ކަމަށެވެ.
މީކާއިލް ވިދާޅުވި ގޮތުގައި އެމްޑީޕީ އޮފީހުގައި މަސައްކަތް ކުރާ މީހުންނަށް ދިން މި ހަމަލާއަކީ ވަކި މީހެއްގެ ފަރާތުން ލިބުނު ހަމަލާއެއް ކަމަށެވެ. އަދި މާރާމާރީއާއި ގުޅިގެން ސޯޝަލް މީޑިއާގައި ފަތުރަމުންދާ ދޮގު މައުލޫމާތުތައް ފެތުރުން ހުއްޓައިލަންވެސް އޭނާ އެދިލެއްވި އެވެ.
ފުލުން މައުލޫމާތު ދިން ގޮތުގައި ސޯސަން މަގުގައި ހުންނަ އެމްޑީޕީ އޮފީހުގެ ތެރޭގައި މާރާމާރީއެއް ހިނގިކަމުގެ މައުލޫމާތު ފުލުހުންނަށް ލިބިފައިވަނީ މިއަދުގެ 12.30 ގައެވެ. އަދި މި މާރާމާރީގައި އަނިޔާވި އަންހެނަކަށް އޭޑީކޭ ހޮސްޕިޓަލުގައި ފަރުވާ ދެމުން އަންނަ ކަމަށްވެސް ފުލުހުން ބުންޏެވެ.
މީކާއިލްގެ މަންމައަކީ ރައީސް މުހައްމަދު ނަޝީދާއި ގާތް ގުޅުމެއް އޮންނަވާ ބޭފުޅެކެވެ.
މި ދުވަސްވަރަކީ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހާއި ދެމެދު ހިޔާލު ތަފާތުވުންތަކެއް އުފެދި ޕާޓީ ތެރޭގައިވެސް ބޮޑެތި ބައިބައިވުންތަކެއް އުފެދިފައިވާ ދުވަސްވަރެއްކަން ފާހަގަކޮށްލެވެ އެވެ. ރައީސް ނަޝީދު ވަނީ މި މާރާކާރީ ހަރުކަށި އިބާރާތުން ކުށްވެރިކޮށްފަ އެވެ. އަދި ހަމަލާ ދިން މީހުންނާއިމެދު ފިޔަވަޅު އަޅަންވެސް ރައީސް ނަޝީދު ގޮވައިލެއްވި އެވެ.
