އަންހެނުން ކުރާ މަސައްކަތުގެ އަގު ވަޒަން ކުރުމަށް ކޮންމެ އަހަރަކު ދެމުން ގެންދާ ރެހެންދި އެވޯޑު މިމަހު 6 ގައި ބާއްވަން ނިންމައިފި އެވެ.
ކޮވިޑް-19 ގެ ސަބަބުން މިދިޔަ 2020 ވަނަ އަހަރު ރެހެންދި އެވޯޑު ބާއްވާފައެއް ނުވެ އެވެ. މިމަހު ބާއްވަނީ މިދިޔަ އަހަރާއި މި އަހަރުގެ އެވޯޑެވެ. އެވޯޑް ހަފްލާ އޮންނާނީ މިމަހުގެ ހަވަނަ ދުވަހުގެ ރޭގަނޑު އެވެ.
ރެހެންދި އެވޯޑަކީ ގައުމީ ހިދުމަތުގައި އެކިއެކި ދާއިރާއިން އަންހެނުން ކުރާ މަސައްކަތްތަކާއި ރާއްޖޭގެ ގައުމީ ތަރައްގީއަށާއި މުޖުތަމައު ބިނާކުރަން އަންހެނުން އަދާކުރާ ދައުރާއި، މުޖުތަމައުގައި އަންހެނުންގެ ކުރިއެރުމަށް ފަރުދުންނާއި މުއައްސަސާތަކާއި ޖަމިއްޔާ ޖަމާއަތްތަކުން ކުރާ މަސައްކަތްތަކުގެ އަގު ގައުމީ ފެންވަރުގައި ވަޒަން ކުރަން ދެމުން އަންނަ އެވޯޑެކެވެ.
ރެހެންދި އެވޯޑްގެ ދާއިރާތައް
- ހަމައެކަނި އަންހެނުންނަށް ކުރިމަތިލެވޭ ދާއިރާ
- ވަޒީފާ ދޭ ފަރާތްތައް/ މުއައްސަސާތައް
- އަންހެނުންގެ ތަރައްގީއަށް މަސައްކަތްކުރާ ކޮމިޓީތައް
- ކުލަބު ޖަމިއްޔާ ޖަމާއަތްތައް
- އަންހެނުންގެ ތަރައްގީއަށް މަސައްކަތްކުރާ ފިރިހެނުންނާއި އަންހެނުންނުން
އެހެން އަހަރުތަކެކޭވެސް އެއްފަދައިން މިއަހަރުގެ އެވޯޑު ހަފްލާގައި ރައީސް ބައިވެރިވެވަޑައިގަންނަވާނެ އެވެ.
މިދިޔަ އަހަރު ރެހެންދި އެވޯޑް ވަނީ ހަތް ބޭފުޅަކަށް ދީފަ އެވެ. ނަމަވެސް ކޮވިޑް-19 އާއި ގުޅިގެން ރަސްމިއްޔާތު ނުބޭއްވޭތީ މިދިޔަ އަހަރުގެ އެވޯޑް ވެސް ހަވާލުކުރާނީ މި ރަސްމިއްޔާތުގަ އެވެ.
ރެހެންދި އެވޯޑު ދޭން ފެށީ 2014 ވަނަ އަހަރު ރައީސް އަބްދުﷲ ޔާމީންގެ ވެރިކަމުގަ އެވެ.
