ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް މިދިޔަ މެއި މަހުގެ ހަވަނަ ދުވަހު ދިން ޓެރަރިސްޓު ހަމަލާއާއި ގުޅިގެން އެމަނިކުފާނުގެ ބަޔާން ނެގުމާއި ގުޅޭ ގޮތުން ޕްރޮސިކިއުޓާ ޖެނެރަލް އޮފީހާއި މަޝްވަރާ ކުރަމުން އަންނަ ކަމަށް ފުލުހުން ބުނެފި އެވެ.
ހަމަލާއާއި ގުޅިގެން ފުލުހުން ކުރިއަށް ގެންދާ ތަހުގީގަށް ބަޔާނެއް ދެއްވުމަށް ރައީސް ނަޝީދު އެއްބަސްވެވަޑައިގެންނެވީ މި މަހު ދޭއްގަ އެވެ. ރައީސް ނަޝީދު ވިދާޅުވީ އެމަނިކުފާނު ހުންނެވީ ބަޔާނެއް ދެއްވަން ތައްޔާރަށް ކަމަށެވެ. އަދި ތުހުމަތު ކުރެވޭ މީހުންގެ ޝަރީއަތްތަކުގެ އިބްތިދާއީ މަރުހަލާ ނިމުމުގެ ކުރިން ބަޔާން ނެންގެވުމަށް ވެސް އެމަނިކުފާނު އެދިވަޑައިގަންނަވަ އެވެ.
ރައީސް ނަޝީދުގެ ބަޔާން ނެގުމާއި ގުޅޭގޮތުން ފުލުހުން ބުނީ އެކަމާއި މެދު ގޮތެއް ނިންމަން ފުލުހުން ޕީޖީ އާއި މަޝްވަރާ ކުރަމުން އަންނަ ކަމަށެވެ. އަދި ވަކި ނިންމުމެއް މިކަމުގައި ނިންމާފައި ނުވާ ކަމަށެވެ.
ޕީޖީ ހުސައިން ޝަމީމް މީގެ ކުރިން ވަނީ ރައީސް ނަޝީދުގެ ބަޔާނެއް ތަހުގީގަށް ދެއްވާނެކަމަށް އުއްމީދު ކުރައްވާކަމަށް ވިދާޅުވެފަ އެވެ.
ބަޔާން ދެއްވަން އެއްބަސްވެވަޑައިގެންނެވުމުގެ ކުރިން ނަޝީދު ވިދާޅުވީ ހަމަލާއާއި ގުޅިގެން ދައްކަން އޮތީ އަމިއްލަފުޅު ޖާނު ކަމަށެވެ. އަދި ބަޔާނަކަށް ދެއްވަން އޮތީ ހިތާއި މޭކަމަށް ވިދާޅުވި އެވެ.
ނަޝީދަށް ދިން ހަމަލާއާއި ގުޅިގެން މިހާތަނަށް ވަނީ 10 މީހަކު ހައްޔަރުކޮށްފަ އެވެ. އޭގެ ތެރެއިން ހަތަރު މީހެއްގެ މައްޗަށް ވަނީ ދައުވާވެސް ކޮށްފަ އެވެ. އެއީ ވ. ތިނަދޫ ލަކީ އަދުހަމް އަހްމަދު ރަޝީދު 25، އާއި، މއ. ފޭރުގެ މުޖާޒް އަހުމަދު 21، އާއި، ގއ. ކޮނޑޭ ފޮޅޭމާ ތަހުމީން އަހްމަދު 32، އަދި ނ. މަނަދޫ ނޫރީގެ އަލީ ހައިޝަމް 27، އެވެ.
މި ހަތަރު މީހުންގެ އިތުރުން ލ. ގަން، ދުންފިނިއުފާ އަހްމަދު ފާތިހުގެ މައްޗަށް ދައުވާ ކޮށްދިނުމަށް ފުލުހުން ޕީޖީ އޮފީހަށް ފޮނުވިނަމަވެސް ދައުވާ ކޮށްފައެއް ނުވެ އެވެ. ފާތިހުގެ މައްޗަށް ދައުވާ ނުކުރުމުން އޭނާ ވަނީ މިނިވަން ވެފަ އެވެ.
