ކުރީގެ ރައީސް އަބްދުﷲ ޔާމީންގެ ސަރުކާރުން އެމްޓީސީސީއަށް ގަތް ކޮންނަ ބޯޓު "މަހާޖައްރާފު" ދުއްވާނެ ކެޕްޓަނުން ހޯދަން އިއުލާންކޮށްފި އެވެ.
މި ވަޒީފާއަށް އެމްޓީސީސީން ކަނޑައަޅާފައިވާ މުސާރައަކީ 109،000 ރުފިޔާ އެވެ. މުސާރައިގެ އިތުރުން ސްޓާފް މެޑިކަލް އިންޝުއަރެންސާއި ޕެންޝަން ސްކީމްގައި ވެސް ބައިވެރިވެވޭނެ އެވެ.
ކެޕްޓަންގެ ވަޒީފާއަށް މީހަކު ނަގާނީ އެއް އަހަރު ދުވަހުގެ ކޮންޓްރެކްޓަށެވެ. އެހެންނަމަވެސް މަސައްކަތުގެ ފެންވަރަށް ބެލުމަށްފަހު އެ މުއްދަތު އިތުރު ކުރާނެ ކަމަށް އެމްޓީސީސީން ބުންޏެވެ.
މިމަގާމަށް ކުރިމަތިލެވޭނީ އޮންލައިން ޖޮބް އެޕްލިކޭޝަން ޕޯޓަލް މެދުވެރިކޮށެވެ. ސުންގަޑިއަކީ މިމަހުގެ ނުވަ ވަނަ ދުވަހެވެ. މަގާމުގެ ޝަރުތުތަކުގެ ތެރޭގައި ކަނޑު އުޅަނދުގެ ދާއިރާ އިން ތަމްރީންނާއި ތައުލީމު ހުންނަން ޖެހެ އެވެ.
މަހާޖައްރާފު ދުއްވަން އެންމެ ފުރަތަމަ ހަރަކާތްތެރިވީ ބިދޭސީންނެވެ. އެހެންނަމަވެސް މިދިޔަ 2020 ވަނަ އަހަރުގެ އޮކްޓޯބަރު މަހުން ފެށިގެން އުޅަނދުގެ އެކި ކަންކަމުގައި ދިވެހިން ވަނީ ހަރަކާތެރިވާން ފަށައިފަ އެވެ. ޖުމްލަ 17 ދިވެހިން ހަރަކާތްތެރިވެ އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ގަތް މަހާޖައްރާފަކީ އެމްޓީސީސީފގެ އެންމެ މުހިންމު އެސެޓެވެ. ރާއްޖޭގައި ހިންގާ ބިން ހިއްކުމުގެ ބޮޑެތި މަޝްރޫއުތައް ކުރިއަށް ގެންދަނީ މި އުޅަނދު މެދުވެރިކޮށެވެ.
