ޔޫތު މިނިސްޓަރު އަހުމަދު މަހްލޫފަށް އެމްޑީޕީގެ އެތެރޭގެ އިންތިހާބުގައި ވާދަ ނުކުރެއްވޭނެ ކަމަށް ނިންމި ނިންމުން އެ ޕާޓީގެ އިސްތިއުނާފު ފަނޑިޔާރުންގެ މަޖިލީހުން އަލުން ބަލަން ފަށައިފި އެވެ.
އެމްޑީޕީގެ ގައުމީ މަޖިލީހުގެ އިންތިހާބުގައި ވާދަކުރައްވަން ނިންމާ ފޯމު ހުށަހަޅުއްވާފައި ވަނިކޮށް މަހުލޫފަށް އިންތިހާބުގައި ވާދަނުކުރެއްވޭނެ ކަމަށް ނިންމައި އެކަން އެމްޑީޕީން އެންގީ މިދިޔަ މަހުގެ 16 ވަނަ ދުވަހު އެވެ. މިމައްސަލަ އަލުން ބަލަން ފެށީ މަހުލޫފު އަމިއްލައަށް އެ މައްސަލަ އިސްތިއުނާފު ފަނޑިޔާރުންގެ މަޖިލީހުގައި އިސްތިއުނާފު ކުރުމުންނެވެ.
އެމްޑީޕީން މަހުލޫފަށް ފޮނުވި ސިޓީގައި ބުނީ، އެތެރޭގެ އިންތިހާބުގައި ވާދަ ނުކުރެވޭނެ ކަމަށް ނިންމި މައްސަލަ އިސްތިއުނާފުކުރުމަށް އޭނާގެ ފަރާތުން އެދިފައިވާތީ، އެ މައްސަލަ ބެލުމަށް އިސްތިއުނާފު ފަނޑިޔާރުންގެ މަޖިލީހުގެ ބައްދަލުވުމެއް ރޭ 8:30 ބޭއްވުމަށް ހަމަޖައްސާފައިވާ ކަމަށެވެ. އަދި ބައްދަލުވުމަށް ވަޑައިގަންނަވާ އިރު ގާނޫނީ ވަކީލެއް ގެނެވިދާނެ ކަމަށްވެސް ސިޓީގައި ވަނީ ބުނެފަ އެވެ.
އެ އިންތިހާބުގައި މަހުލޫފް ކުރިމަތި ލައްވާފައިވަނީ ކ، އއ. އދ. ވ ހިމެނޭ މެދު އުތުރު ޕްރޮވިންސްގެ ރައީސް ކަމަށެވެ.
މަހުލޫފުގެ މައްޗަށް އެމްއެމްޕީއާރުސީ ހިޔާނާތުގެ ތުހުމަތުތަކެއް ކުރެވޭއިރު އެކަމާއި ގުޅިގެން އޭނާ ވަނީ މިނިސްޓަރުކަމުންވެސް ސަސްޕެންޑު ކޮށްފަ އެވެ.
