ރާއްޖެއާއި ގުޅުންހުރި މައްސަލަތަކުގައި ޔޫރަޕިއަން ޔޫނިއަން (އީޔޫ) އާއިއެކު މަޝްވަރާކުރަން ދިވެހި ސަރުކާރުގެ ވަފުދެއް ޔޫރަޕަށް ފުރަން ތައްޔާރުވެއްޖެ އެވެ.
މިވަފުދު ފުރާނީ މިރޭގެ ވަގުތެއްގަ އެވެ. ވަފުދުގައި އިސްކޮށް ހުންނަވާނީ ރާއްޖޭގެ ފޮރިން ސެކްރެޓަރީ އަބްދުލްގަފޫރު މުހައްމަދެވެ. މީގެއިތުރުން ފޮރިން މިނިސްޓްރީގެ އިސް ބައެއް ބޭފުޅުންނާއި، ރައީސް އޮފީހާއި، ފުލުހުންގެ އިދާރާއާއި، އިކޮނޮމިކް މިނިސްޓްރީއާއި، ނެޝަނަލް ކައުންޓާ ޓެރަރިޒަމް ސެންޓަރާއި، އެންވަޔަރަންމަންޓް މިނިސްޓްރީގެ އިސް ބޭފުޅުން ވެސް ވަފްދުގައި ހިމެނެ އެވެ.
އީޔޫ ވަފްދުގައި އިސްކޮށް ހުންނަވާނީ ޔޫރަޕިއަން އެކްސްޓާނަލް އެކްޝަން ސާވިސްގެ މެނޭޖިން ޑިރެކްޓަރު ޕައޯލާ ޕަމްޕަލޯނީ އެވެ.
މިމަޝްވަރާ ބައްދަލުވުންތައް ފަށާނީ މިމަހުގެ 10 ވަނަ ދުވަހު އެވެ. ބައްދަލުވުން އޮންނާނީ އީޔޫގެ މައި އިދާރާގަ އެވެ. އެއީ ބެލްޖިއަމްގެ ބްރަސަލްސްގަ އެވެ.
ފޮރިން މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ މިބައްދަލުވުމުގައި މައިގަނޑު ގޮތެއްގައި މަޝްވަރާކުރާނީ ހިންގުން ހަރުދަނާކުރުމާއި، ޑިމޮކްރަސީއާއި، އިންސާނީ ހައްގުތަކާއި، ގާނޫނު ނެގެހެއްޓުމާއި، ހައްދުފަހަނަ ދިއުން ހުއްޓުވުމާއި، ޓެރަރިޒަމާ ދެކޮޅަށް އަޅާ ފިޔަވަޅުތަކާ ގުޅޭގޮތުންނާއި، އިގްތިސާދާއި ވިޔަފާރި އަދި ތަރައްގީގެ ދާއިރާގައި ގުޅުން ބަދަހިކުރުމާ ގުޅޭގޮތުން ކަމަށެވެ. އަދި ބައިނަލްއަގްވާމީ އަދި ސަރަހައްދީ ގުޅުންތައް ބަދަހިކުރުމާއި، އިގްތިސޯދު އާރާސްތުކުރުމާ ގުޅޭގޮތުން ވެސް މިބައްދަލުުވުމުގައި މަޝްވަރާކުރާނެ އެވެ.
ދިވެހި ސަރުކާރުގެ އިސް ވަފުދުގެ މި ދަތުރުގައި އީޔޫގެ ޑިރެކްޓޮރޭޓް ޖެނެރަލް ފޮ މެރިޓައިމް އެފެއާޒް އެންޑް ފިޝަރީޒްއާއި ދިވެހި ވަފުދުން ބައްދަލުކުރައްވާނެ އެވެ. މި ބައްދަލުވުމުގައި ރާއްޖެއިން ޔޫރަޕްގެ ގައުމުތަކަށް ބޭރުކުރާ މަހުގެ ބާވަތްތަކަށް ނަގާ ޑިޔުޓީ ކުޑަކުރުމަށްވެސް މަޝްވަރާ ކުރާނެ އެވެ.
