ސިނަމާލެ ބްރިޖުގައި ރޭ ދަންވަރު ހިނގި ނުރައްކާތެރި އެކްސިޑެންޓެއްގައި ދެ މީހަކަށް އަނިޔާވެއްޖެ އެވެ.
ފުލުހުން ބުނީ މި އެކްސިޑެންޓުގެ ރިޕޯޓު އެ އިދާރާއަށް ލިބުނީ ރޭ ދަންވަރު 12:45 ގައި ކަމަށެވެ. އެކްސިޑެންޓުގައި އަނިޔާވީ ސައިކަލު ދުއްވަން އިން ދެ މީހުންނަށެވެ. އޭގެ ތެރެއިން އެކަކަށް ފަރުވާ ދެމުން އަންނަނީ ހުޅުމާލެ ހޮސްޕިޓަލުގަ އެވެ. އަދި އަނެކަކަށް ފަރުވާ ދެނީ ޓްރީޓޮޕް ހޮސްޕިޓަލުގަ އެވެ.
ރޭ ހިނގި އެކްސިޑެންޓުގައި އެއް ސައިކަލު ދުއްވަން އިން މީހާގެ ސައިކަލު ދުއްވުމުގެ ލައިސަންސް ނެތްކަމަށް ފުލުހުން ބުންޏެވެ. އެއީ 31 އަހަރުގެ މީހެކެވެ. ދެން އަނިޔާވީ 24 އަހަރުގެ މީހަކަށެވެ.
އެކްސިޑެންޓު ހިނގަން މެދުވެރިވީ ރެޑް ލައިޓު ދިއްލިފައި އިންދާ އެތަނުން އެއް ސައިކަލު މަޑުނުކޮށް ދާން އުޅުމުން އެއާޕޯޓަށް ދިޔަ ސައިކަލެއްގައި ޖެހިގެން ކަމަށް ފުލުހުން ބުންޏެވެ.
ފުލުހުން ބުނީ ދެ ސައިކަލުވެސް ޓޯކޮށް މައްސަލަ އިތުރަށް ތަހުގީގު ކުރަމުން އަންނަކަމަށެވެ.
