ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން މިރޭގެ ވަގުތެއްގައި ރާއްޖޭގެ ޓީވީ ޗެނަލްއަކަށް އިންޓަވިއުއެއް ދެއްވަން އުޅުއްވާކަމަށް ދެކެވޭ ވާހަކަތައް އެމަނިކުފާނުގެ ވަކީލުން ދޮގުކުރައްވައިފި އެވެ.
ބައެއް ފަރާތްތަކުން ސޯޝަލް މީޑިއާގައި ރޭގެ ވަގުތެއްގައި ބުނެފައިވަނީ މިރޭ 10 ޖަހާއިރު ޗެނަލް 13 ގެ "ހަޖަމް" ނަމަކަށް ކިޔާ ޕްރޮގުރާމުގައި ރައީސް ޔާމީން ބައިވެރިވެވަޑައިގަންނަވާނެ ކަމަށެވެ. އެމަނިކުފާނު މިވަގުތު ހުންނެވީ ގޭގައި ނަމަވެސް ގެންދަވަނީ ޖަލު ހުކުމް ތަންފީޒު ކުރައްވަމުންނެވެ. އެހެންކަމުން މީޑިއާއަކަށް އިންޓަވިއު ދެއްވުމަކީ މޯލްޑިވްސް ކަރެކްޝަނަލް ސާވިސްގެ ގަވާއިދާއި ހިލާފު ކަމެކެވެ.
މިކަމާއި ގުޅިގެން ރައީސް ޔާމީންގެ ވަކީލު އަބްދުﷲ ޝިޔާޒް ވިދާޅުވީ މިރޭގެ ވަގުތެއްގައި ޔާމީން ޓީވީ ޕްރޮގުރާމެއްގައި ބައިވެރިވެވަޑައިގަންނަވާނެ ކަމަށް އެކި ފަރާތްތަކުން ފަތުރަމުން ގެންދަނީ އެއްވެސް ހަގީގަތެއް ނެތް ވާހަކަތަކެއް ކަމަށެވެ.
އަދި ރައީސް ޢަބްދުﷲޔާމީން ޢަބްދުލްޤައްޔޫމް މިރޭ ޓީވީ ޕްރޮގްރާމެއްގައި ބައިވެރިވެވަޑައިގަންނަވާނެ ކަމަށް ބުނެ ޙަޤީޤަތާއި ޚިލާފް ހަބަރުތައް ނުފެތުރުމަށް ހުރިހާ ހަބަރުފަތުރާ ވަޞީލަތްތަކާއި، ނޫސްތަކާއި އަދި ލޮބުވެތި ދިވެހި ރައްޔިތުންގެ ކިބައިން އެމަނިކުފާނު އެދިވަޑައިގަންނަވައެވެ.
— Abdulla Siyaz (@AbdullaSiyaz) September 9, 2021
ކުރީގެ ރައީސް އަބްދުﷲ ޔާމީން ޖަލު ހުކުމެއް ތަންފީޒު ކުރައްވަމުން ގެންދަވަނީ އެމްއެމްޕީއާރުސީ ހިޔާނާތާއި ގުޅިގެން މަނީ ލޯންޑަރިންގެ ކުށް ސާބިތުވެގެންނެވެ.
