ޔުނެސްކޯއިން ގްރޭޑު 7، 8 އަދި 9 ގެ ދަރިވަރުންނަށް އަމާޒުކޮށް ހިންގި ޕައިލެޓް ޕްރޮޖެކްޓެއްގައި ކަލަކު ވޮޑިގެންވޭތޯ ނުވަތަ ނުވޭތޯ ޝައްކު އުފެއްދި މައްސަލައިގައި ފިޔަވަޅު އެޅުމަށް ގޮވާލައި ރައްޔިތުންގެ އިއްތިހާދުން ކޮމިޝަނާ އޮފް ޕޮލިސް މުހައްމަދު ހަމީދަށް ސިޓީއެއް ފޮނުވައިފި އެވެ.
ޔުނެސްކޯއިން އެޑިއުކޭޝަން މިނިސްޓްރީއާއި ގުޅިގެން ހިންގި ޕައިލެޓް ޕްރޮގުރާމެއްގައި ވަނީ ކަލަކު ވޮޑިގެންވޭތޯއާއި ވާނަމަ މީހުން ދެރަވަނީ އަދި ފަގީރުން ދުނިޔޭގައި އުޅެނީ އަދި އިންސާނުން ބަލިވަނީ ކީއްވެތޯ ވަނީ ސުވާލު އުފައްދައިފަ އެވެ.
މިމައްސަލަ ފުލުހުންނަށް ހުށަހެޅީ ގިނަ ދީނީ އިލްމުވެރިން ހިމެނޭގޮތަށް ޖަމިއްޔާތައް ގުޅިގެން އުފައްދާފައިވާ ރައްޔިތުންގެ އިއްތިހާދުންނެވެ. އެއިއްތިހާދުން ބުނެފައިވަނީ ދަރިވަރުންގެ ދީނީ އަގީދާ ހަލާކުކޮށް އިލްހާދުފަތުރަން މަސައްކަތް ކޮށްފައިވާ ކަމަށާއި އަދި ދިވެހިރާއްޖޭގެ ތައުލީމީ މުޣައްރަރު ލާދީނީ ކުރުމަށް ކުރަމުންގެންދާ ގައިރުގާނޫނީ މަސައްކަތް މިހާރުން މިހާރަށް ހުއްޓާލުމަށް ގޮވައިލާ ކަމަށެވެ.
އިއްތިހާދުން ވަނީ ޔުނެސްކޯއާއި ދޭތެރޭ މިހާރުން މިހާރަށް ފިޔަވަޅު އެޅުމަށްވެސް ކޮމިޝަނާގެ އަރިހުން އެދިފަ އެވެ. ކޮމިޝަނަރަށް ފޮނުވާފައިވާ ސިޓީގައި އިތުރަށް ބުނެފައިވަނީ، (ގްލޯބަލް ސިޓީޒަން މޮޑިއުލް) ގެ ނަމުގައި ފާޅުގައި އެތީޒަމް ކުޑަ ކުދިންގެ ހިތްތަކަށް ވައްދާ، ﷲ ވޮޑިގެންނުވާކަމަށް ގަބޫލުކުރާ ފިކުރުތައް ގަސްތުގައި ރާވައިގެން އެކުދިން ބޮލަށް ވައްދަން މަސައްކަތް ކުރިކަން ވަނީ ބޭޒާރުވެފައި ކަމަށެވެ.
Breaking news
ޔުނެސްކޯން ގްރޭޑް 7،8،9 ގެދަރިވަރުންގެ މެދުގައި ހިންގި ޕައިލެޓް ޕްރޮޖެކްޓްގައި މާތްﷲ ވޮޑިގެންވޭތޯ ނުވޭތޯ ޝައްކު އުފައްދާ މުޤައްރަރު ލާދީނީ ކުރަން ކުރާ ޣައިރު ޤާނޫނީ މަސައްކަތް މިހާރުން މިހާރަށް ހުއްޓުވައި ފިޔަވަޅު އެޅުމަށް ރައްޔިތުންގެ އިއްތިޙާދުން ފޮނުވާ ސިޓީ pic.twitter.com/G0Oa75p9WK— Rithihaadhu (@rithihaadhu) September 9, 2021
މީގެ އިތުރުން ދީނީ އެއްބައިވަންތަކަން ހިމާޔަތްކުރާ ގާނޫނާއި ގަވާއިދު ހިމާޔަތްކުރުމުގެ ގޮތުން، އެފަދަ ކަމެއް ހިންގުމަކީ ވަގުތުން ފިޔަވަޅު އަޅަން ޖެހޭނެ ކަމެއްކަން ހަނދުމަ ކޮށްދޭ ކަމަށާއި އެހެންކަމުން ރަސްމީކޮށް އެ މައްސަލަ ފުލުސް އޮފީހަށް ހުށަހަޅާ ކަމަށްވެސް އިއްތިހާދުން ވަނީ ބުނެފަ އެވެ.
އިސްލާމް ފޮތުގައި ގުރުއާނުގެ މާނަ އޮޅުވާލާފައި ހުރުމާއި، އަދި ބައެއް ފޮތްތަކުގައި ގުރުއާން ނުބައިކޮށް ލިޔެފައިހުރިކަން ބޭޒާރުވެފައިވާ ދަނޑިވަޅެއްގައި މިކަމުގައި ޝާމިލްވާ އެންމެހާ ފަރާތްތަކާއި މެދު ފިޔަވަޅު އެޅުމަށް ރައްޔިތުންގެ އިއްތިހާދުގެ ފަރާތުން ފޮނުވި ސިޓީގައި އެދިފައިވެ އެވެ.
