ސިޔާސީ ނުފޫޒުގައި ޖެހިގެން މޯލްޑިވްސް ކަރެކްޝަނަލް ސާވިސަސްގެ ވެރިން ހަގީގަތާއި ހިލާފު ވާހަކަ ދައްކާތީ ކުރީގެ ރައީސް އަބްދުﷲ ޔާމީންގެ ވަކީލުން އެކަން ކުށްވެރިކޮށްފި އެވެ.
ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ރައީސް ޔާމީން އިއްޔެ ވަނީ އިދިކޮޅުން ބޭއްވި މުޒާހަރާގެ ބައިވެރިންނަށް އިޝާރާތް ކުރައްވައި އެމަނިކުފާނުގެ ގޭގެ ކުޑަދޮރުން ދިދަ ވިހުރުވާ ލައިފަ އެވެ. މިކަމާއި ގުޅިގެން އެމަނިކުފާނު ކަރެކްޝަންސްގެ ގަވާއިދުތަކާއި ހިލާފުވެފައިވާކަމަށާއި ފިޔަވަޅު އަޅުއްވާނެ ކަމަށް ކޮމިޝަނާ އޮފް ޕްރިޒަންސް ވަނީ ވިދާޅުވެފަ އެވެ.
ކޮމިޝަނާގެ ވާހަކައަށް އިޝާރާތް ކުރައްވައި ރައީސް ޔާމީންގެ ލޯޔަރުންގެ ޓީމުގައި އިސްކޮށް އުޅުއްވާ ކުރީގެ ނައިބުރައީސް ޑރ. މުހައްމަދު ޖަމީލު އަހުމަދު ވިދާޅުވީ ރައީސް ޔާމީން އެއްވެސް ގާނޫނަކާއި އަދި ގަވާއިދަކާވެސް ހިލާފުވެވަޑައިގެންފައި ނުވާކަމަށެވެ. އަދި ވިދާޅުވީ ގޭބަންދު ޝަރުތުތަކަށް ރައީސް ޔާމީން ފުރިހަމައަށް ތަބާވެވަޑައިގަންނަވާ ކަމަށެވެ.
ޑރ. ޖަމީލު އިތުރަށް ވިދާޅޫވީ ކަރެކްޝަންސްގެ ވެރިން ސިޔާސީ ނުފޫޒުގައި ޖެހިގެން ހަގީގަތް އޮޅޭގޮތަށް ދައްކަވާ ވާހަކަތައް ކުށްވެރިކުރައްވާ ކަމަށެވެ.
ރައީސް ޔާމީން ޖަލު ހުކުމެއްގައި ހުންނަވައިގެން ގޭގެ ކުޑަދޮރުން މުޒާހަރާގެ ބައިވެރިންނަށް އިޝާރާތް ކޮށްލި މައްސަލަ ކަރެކްޝަނުން ކުށްވެރިކޮށްފައިވާއިރު މިހާރުގެ ހޯމް މިނިސްޓަރު އިމްރާން އަބްދުﷲ ޖަލު ހުކުމުގައި ގޭގައި ހުންނަވައި އީދު ކުޅިވަރުގައިވެސް ބައިވެރިވެވަޑައިގެންނެވި އެވެ. އަދި ކުރީގެ ނައިބު ރައީސް އަހުމަދު އަދީބު ވަނީ 2018 ވަނަ އަހަރުގެ ޑިސެމްބަރު މަހުގެ ތެރޭގައި އަމިއްލަފުޅު ސިޔާސީ ޕާޓީއެއްވެސް އުފައްދަވައިފަ އެވެ. އަދީބުވެސް އޭރު ހުންނެވީ ޖަލު ހުކުމެއް ތަންފީޒު ކުރައްވާށެވެ. މިދެބޭފުޅުންނަށްވެސް ކަރެކްޝަނުން ފިޔަވަޅު އަޅާފައެއް ނުވެ އެވެ.
