އިންޑިއާ ކަނޑުގެ ސަލާމަތާއި ރައްކާތެރިކަމަށް މި ސަރަހައްދުގެ ގައުމުތަކުގެ މެދުގައި އިންޓެލިޖެންސް ހިއްސާކުރުން މުހިންމުކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ
މާރިޔާ މިފަދައިން ވިދާޅުވީ މިމަހުގެ 6 ވަނަ ދުވަހުން 8 ވަނަ ދުވަހަށް ކުރުނބާ މޯލްޑިވްސްގައި ގިނަ ގައުމުތަކެއްގެ ޑިފެންސް އިންޓެލިޖެންސްގެ ވެރިންނާއިއެކު ކުރިއަށް ގެންދިޔަ 14 ވަނަ އިންޑޯ ޕެސިފިކް އިންޓެލިޖެންސް ޗީފްސް ކޮންފަރެންސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.
މިނިސްޓަރު ވިދާޅުވީ ދުނިޔޭގެ ވިޔަފާރީގައި އެންމެ މުހިންމު ކަނޑުގެ މަގުތައް ހުންނަ އަދި ދުނިޔޭގެ އާބާދީގެ ތެރެއިން ބިލިއަނަކަށްވުރެއް ގިނަ މީހުން ދިރިއުޅޭ އިންޑިއާ ކަނޑުގެ ސަލާމަތަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ދުނިޔޭގެ ބެސްޓް ޕްރެކްޓިސްއާއި އެއްގޮތަށް ގައުމުތަކުގެ މެދުގައި އިންޓެލިޖެންސް ހިއްސާކުރުން މުހިންމު ކަމަށެވެ. އަދި ހަރުކަށި ފިކުރާއި ޓެރަރިޒަމާއި ދެކޮޅަށް ތަމްރީނު ދިނުމުގެ ޕްރޮގުރާމްތައް ހިންގުން މުހިންމުކަމަށް ވިދާޅުވި އެވެ. މާރިޔާ ވިދާޅުވީ އެފަދަ ތަމްރީނު ޕްރޮގުރާމްތައް ހިންގުމަކީ ރައީސް އިބްރާޙިމް މުހައްމަދު ސޯލިހު އަބަދުވެސް ތާއީދުކުރައްވާ ކަމެއްކަމަށެވެ.
މިނިސްޓަރު ވިދާޅުވީ މިކޮންފަރެންސްގެ ސަބަބުން އިންޓެލިޖެންސް ހިއްސާކުރުމާއި ތަމްރީނު ފޯރުކޮށްދިނުމުގެ އިތުރު ދޮރުތައް ހުޅުވޭނެކަމަށް އުއްމީދުކުރައްވާ ކަމެވެ.
މިއަހަރުގެ ކޮންފަރެންސްގައި ވިއްސައްވުރެއް ގިނަ ގައުމުން ބައިވެރިވެ އެވެ. މިއަހަރުގެ މައުޟޫއަކީ "އޯވާކަމިން ގްލޯބަލް އިންޓެލިޖެންސް ޗެލެންޗަސް ތުރޫ ޕާޓްނަޝިޕް" އެވެ.
