ކުރީގެ ރައީސް އަބްދުﷲ ޔާމީންގެ މައްޗަށް އެމްއެމްޕީއާރުސީ ހިޔާނާތާއި ގުޅިގެން އެއްވެސް ދައުވާއެއް ނުކުރެވޭނެ ކަމަށާއި، ހިޔާނާތުގެ ފައިސާއިން މަންފާ ލިބުނު މީހުންގެ ސައްހަ ލިސްޓު ފެށޭނީ ޕްރޮސެކިއުޓާ ޖެނެރަލް ހުސައިން ޝަމީމް އާއި ހަމައިންކަމަށް ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
ޖިންސީ ފުރައްސާރައިގެ ތުހުމަތުތަކެއް ކުރެވި ޝަރީއަތް ކުރިއަށް ދަނިކޮށް އިނގިރޭސިވިލާތަށް ވަޑައިގެން އެތަނުގައި ހުންނަވައި އަލީ ވަހީދު ގެންދަވަނީ ސަރުކާރާއި ދެކޮޅަށް ބައެއް ވާހަކަތައް އާންމު ކުރައްވަމުންނެވެ.
ރައީސް ޔާމީންގެ މައްޗަށް ކޮށްފައިވާ 5 އަހަރުގެ ޖަލު ހުކުމް އިސްތިއުނާފުކުރުމަށް މިއަދު ސުޕްރީމް ކޯޓުގައި ޝަރީއަތްތައް ފެށުމާއިއެކު އަލީ ވަހީދު މިއަދު ވިދާޅުވީ ރައީސް ޔާމީންގެ މައްޗަށް އެމްއެމްޕީއާރުސީ ހިޔާނާތުގެ މައްސަލައާއި ގުޅުވައި އެއްވެސް ދައުވާއެއް ނުކުރެވޭނެ ކަމަށެވެ. އަދި އެމަނިކުފާނުގެ ވެރިކަމުގައި ރާއްޖެއިން ބޭރުގައި ކުރެވުނު ތަހުގީގުގައި އެމަނިކުފާނުގެ އެކައުންޓުތައް ފްރީޒް ނުކުރެވުނީ މިދެންނެވި ސަބަބާއި ހެދިކަމަށް ވިދާޅުވި އެވެ. އަލީ ވަހީދު ވަނީ ރައީސް ޔާމީން މިނިވަންކުރުމަށްވެސް ގޮވާލައްވައިފަ އެވެ.
އިތުރަށް އޭނާ ވިދާޅުވީ ހިޔާނާތުގެ ސައްހަ ލިސްޓު ފެށެނީ އަދުގެ ޕްރޮސެކިއުޓާ ޖެނެރަލް ޝަމީމްއާއި ހަމައިން ކަމަށެވެ. ރެހެންދި ފްލެޓުން ކަޅު ދަބަސް ހިފައިގެން ނިކުތް މީހުން ނޯޅޭ ކަމަށްވެސް އަލީ ވަހީދު ވިދާޅުވި އެވެ.
"ތިޔަ ފޯނުތަކާއި ލެޕްޓޮޕާ އިނގިރޭސި ތަހުގީގު ޓީމަށް ރައްދުކޮށްދިނީ އަޅުގަނޑު. ޖަލަށް ލިޔަސް، މަރާލިޔަސް، އިރާދަފުޅުން މިއަޑު ކަނޑުވާނުލެވޭނެ"
- އަލީ ވަހީދު
މީގެ އިތުރުން ކީރިތި ރަސޫލާއަށް ފުރައްސާރަކުރި އެމްޑީއެންގެ ޗެއާޕާސަންކަން ކުރިކަން ހަނދާން ނެތްކަމަށް ވިދާޅުވި މީހަކަށް، ރައްޔިތުންގެ ނޭވާ ހޮޅިން ވެންޓިލޭޓަރުން ވައްކަން ކުރިކަން ނޭނގުނު މީހަކަށް، ފަތިސްކަމަށް މެންދުރު ޓުވީޓު ކުރާ މީހަކަށް އަލީ ވަހީދުވެސް އޮޅިދާނެ ކަމަށް އޭނާ ވިދާޅުވި އެވެ. ޕީޖީ ޝަމީމަށް ރައްދުކޮށް އަލީ ވަހީދު މިފަދައިން ވިދާޅުވީ އުންސުރު ހަމަނުވާކަމަށް ވިދާޅުވެ ވެންޓިލޭޓަރު ހިޔާނާތުގެ މައްސަލައިގައި ދައުވާ ކުރުމަށް ދެކޮޅު ހެދުމުންނެވެ.
އަލީ ވަހީދު މި އިޝާރާތް ކުރެއްވީ މީގެ ކުރިން އެމްޑީއެން ޖަމިއްޔާއިން ކީރިތި ރަސޫލާއަށާއި އިސްލާމް ދީނަށް ފުރައްސާރަ ކޮށް ރިޕޯޓު ނެރުނު މައްސަލައިގައި އެ ޖަމިއްޔާގެ އެއްވެސް އިސް ބޭފުޅަކަށް ފިޔަވަޅު އަޅާފައި ނުވާ މައްސަލައަށެވެ. ޕީޖީ ޝަމީމްއަކީ މީގެ ކުރިން އެމްޑީއެންގެ ޗެއާޕާސަންކަން ކުރެއްވި ބޭފުޅެކެވެ.
އަލީ ވަހީދު ވަނީ އުންސުރު ހަމަކޮށްދޭނެ ކަމަށް ވިދާޅުވެ ޕީޖީއަށް ނުރުހުމުގެ ބަސްތައް ރައްދުކުރައްވައިފަ އެވެ.
ޖިންސީ ފުރައްސާރައިގެ މައްސަލައެއްގައި އަލީ ވަހީދު މަގާމުން ވަކިކުރެއްވީ ރައީސް އިބްރާހިމް މުހައްމަދު ސޯލިހު އެވެ. އޭރުވެސް އަލީ ވިދާޅުވީ އެއީ ބަޔަކު ރާވައިގެން އޭނާގެ ސިޔާސީ ހަޔާތް ދުއްވާލުމަށް ހިންގި ޖަރީމާއެއް ކަމަށެވެ. އެމައްސަލައިގެ ޝަރީއަތް ފެށިނަމަވެސް ވަކި ހިސާބަކުން އަލީ ވަހީދު އިނގިރޭސިވިލާތަށް ވަޑައިގެންނެވި އެވެ. އަލީ ފުރުވައިލީ ދައުލަތުން ގުޅިގެންކަމަށް ތުހުމަތު ކުރެވުނެވެ.
