މާލެ އަތޮޅު ކައުންސިލްގެ އޮފީސް ފަޅާލައި ފައިސާތަކެއް ވަގަށް ނަގައިފި

މާލެ އަތޮޅު ކައުންސިލްގެ އޮފީސް ފަޅާލައި ގިނަ އަދަދެއްގެ ފައިސާ ވަގަށް ނަގައިފި އެވެ.

ފުލުހުން ބުނީ މާލެ އަތޮޅު ކައުންސިލްގެ އޮފީސް ފަޅާލާ، އެތަނުގެ ތިޖޫރީއިން ގިނަ އަދަދެއްގެ ފައިސާ ވަގަށް ނަގާފައިވާ ކަމުގެ ރިޕޯޓު މިއަދު ލިބިފައިވާ ކަމަށެވެ. ރިޕޯޓު ލިބުނީ މިއަދު ހެނދުނު 8:15 ގައި ކަމަށް ފުލުހުން ބުންޏެވެ.

ފުލުހުން ބުނީ މިމައްސަލަ އިތުރަށް ތަހުގީގު ކުރަމުން އަންނަ ކަމަށެވެ. ވަގަށް ގެއްލުނީ ކިހާ އަދަދެއްގެ ފައިސާއެއްކަމެއް އަދި ފުލުހުން ހާމައެއް ނުކުރެ އެވެ.

މިމައްސަލައާއި ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ނުވެ އެވެ.

މާލެ އަތޮޅު ކައުންސިލްގެ އޮފީސް ފަޅައިލިކަން އެނގުނީ މިއަދު ހެނދުނު އޮފީސް ހުޅުވިފަހުން ކަމަށް މައުލޫމާތު ލިބެ އެވެ. އެހެންކަމުން އޮފީސް ފަޅައިލީ ރޭގެ ވަގުތެއްގައިކަމަށް ބެލެވެ އެވެ.