މާލެ ސަރަހައްދުން 51 މީހުންނާއިއެކު މުޅި ޖުމްލަ 138 މީހުން ރާއްޖެއިން ކޮވިޑް-19 އަށް ޕޮޒިޓިވްވެއްޖެ އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމުކުރި މައުލޫމާތުތައް ދައްކާގޮތުން މިއަދު އިރުއޮއްސި 6 ޖެހުމާއި ހަމައަށް ވޭތުވެދިޔަ 24 ގަޑިއިރު ތެރޭގައި އަތޮޅުތެރޭގެ މީހުން ދިރިއުޅޭ ރަށްތަކުން 72 މީހުން ޕޮޒިޓިވްވި އެވެ. އަދި ރިޒޯޓުތަކުން 15 މީހުން ޕޮޒިޓިވްވި އެވެ.
މިހާރު އެކްޓިވް ކޭސްތަކުގެ ގޮތުގައި ވަނީ 2،037 ކޭސް އެވެ. އޭގެ ތެރެއިން ހޮސްޕިޓަލުތަކުގައި ފަރުވާ ދެނީ 17 މީހުންނަށެވެ. ރާއްޖެއިން ކޮވިޑުގައި މަރުވި މީހުންގެ އަދަދަށް ބަދަލެއް ނާދެ އެވެ. އެއީ 227 މީހުންނެވެ.
ކޮވިޑް ދިފާއު ވެކްސިން ދިން މީހުންގެ ތަފްސީލުތައްވެސް އެޗްޕީއޭއިން ވަނީ އާންމުކޮށްފަ އެވެ. އެގޮތުން ފުރަތަމަ ޑޯޒް ވަނީ 477 މީހަކަށް މިއަދު ދީފަ އެވެ. މިހާރު ޖުމްލަ ފުރަތަމަ ޑޯޒް ދިން މީހުންގެ އަދަދަކީ 388،776 އެކެވެ.
ދެވަނަ ޑޯޒް މިއަދު ދިނީ 4،051 މީހުންނަށެވެ. މިއާއެކު ކޮވިޑް ވެކްސިން ފުރިހަމަކުރި މީހުންގެ އަދަދު ވަނީ 319،080 އަށް އަރައިފަ އެވެ.
